ഖത്തർ കലണ്ടറിലെ ഏറെ ആകാംക്ഷയോടെ കാത്തിരിക്കുന്ന ‘ഖത്തർ ടോയ് ഫെസ്റ്റിവൽ’ (QTF) 2026-ൽ വീണ്ടും എത്തുന്നു. ‘More to Imagine, A Whole World of Fun’ എന്ന പ്രമേയത്തിലാണ് ഇത്തവണ മേള അരങ്ങേറുന്നത്. ജൂലൈ 1 മുതൽ 31 വരെ ദോഹ എക്സിബിഷൻ ആൻഡ് കൺവെൻഷൻ സെന്ററിൽ (DECC) വെച്ചാണ് ഈ വിനോദ മാമാങ്കം നടക്കുക. നാല് ഹാളുകളിലായി 22,000 ചതുരശ്ര മീറ്ററിൽ വ്യാപിച്ചു കിടക്കുന്ന ഈ വർഷത്തെ എഡിഷൻ, ഇതുവരെയുള്ളതിൽ വെച്ച് ഏറ്റവും വലിയ മേളയായിരിക്കും.
സന്ദർശകർക്കായി വിപുലമായ വിനോദങ്ങൾ
വിസിറ്റ് ഖത്തറിന്റെ ‘ഹാലാ സമ്മർ’ (Hala Summer) കാമ്പെയ്നിന്റെ ഭാഗമായി നടത്തുന്ന ഈ ഫെസ്റ്റിവൽ, സ്പേസ്ടൂൺ ഗ്രൂപ്പുമായി സഹകരിച്ചാണ് സംഘടിപ്പിക്കുന്നത്. ആഗോള ബ്രാൻഡുകൾ, ലൈവ് പെർഫോമൻസുകൾ, ഷോപ്പിംഗ് സൗകര്യങ്ങൾ, വിവിധ വിനോദ പരിപാടികൾ എന്നിവ ഒരേ കുടക്കീഴിൽ അണിനിരത്തുന്ന ഒരു സമ്പൂർണ്ണ വിനോദ അനുഭവമായിരിക്കും ഖത്തർ ടോയ് ഫെസ്റ്റിവൽ 2026 സമ്മാനിക്കുക.
വിവിധ പ്രായക്കാർക്കായി പ്രത്യേക മേഖലകൾ
പ്രീ-സ്കൂൾ കുട്ടികൾ, കൗമാരക്കാർ, യുവാക്കൾ, ടോയ് കളക്ടർമാർ തുടങ്ങി എല്ലാ പ്രായത്തിലുള്ളവർക്കും അനുയോജ്യമായ രീതിയിൽ വിപുലീകരിച്ച തീം സോണുകൾ മേളയിലുണ്ടാകും. പുതുതായി ഒരുക്കുന്ന ഇമ്മേഴ്സീവ് സ്റ്റേജ് ഹാളിൽ സംഗീത പരിപാടികൾ, ഷോകൾ, മത്സരങ്ങൾ, തത്സമയ പ്രകടനങ്ങൾ എന്നിവ അരങ്ങേറും. കൂടാതെ, ഡിജിറ്റൽ കണ്ടന്റ് ക്രിയേറ്റർമാർക്കായി പ്രത്യേകം തയ്യാറാക്കിയ ‘ഇൻഫ്ലുവൻസേഴ്സ് സോൺ’ (Influencers Zone) മേളയുടെ പ്രധാന ആകർഷണമായിരിക്കും.
