മെട്രോയിൽ ടൂറുകളും കോംപ്ലിമെന്ററി പാസുകളും, വേൾഡ് ടൂറിസം ഡേ പ്രമാണിച്ച് വിവിധ പരിപാടികളുമായി ഖത്തർ റെയിൽ
സെപ്‌തംബർ 27ന് വേൾഡ് ടൂറിസം ഡേ പ്രമാണിച്ച് ഖത്തർ റെയിൽവേ കമ്പനി (ഖത്തർ റെയിൽ) ഖത്തറിലെ വിനോദസഞ്ചാരം പ്രോത്സാഹിപ്പിക്കുന്നതിന് നിരവധി സംരംഭങ്ങൾ ആരംഭിച്ചിട്ടുണ്ട്. സുഗമവും ഉയർന്ന നിലവാരമുള്ളതുമായ യാത്രാനുഭവം നൽകുന്ന ദോഹ മെട്രോയും ലുസൈൽ ട്രാമും ഉപയോഗിക്കാൻ സന്ദർശകരെ പ്രോത്സാഹിപ്പിക്കാനുള്ള ശ്രമവും ഇതിന്റെ ഭാഗമാണ്.
ഖത്തറിനെ മികച്ച വിനോദസഞ്ചാര കേന്ദ്രമാക്കി മാറ്റുന്നതിനും താമസക്കാർക്കും സന്ദർശകർക്കും മൊത്തത്തിലുള്ള അനുഭവം മെച്ചപ്പെടുത്തുന്നതിനുമുള്ള ഖത്തർ റെയിലിൻ്റെ ലക്ഷ്യങ്ങളുടെ ഭാഗമാണിത്. മെട്രോയും ട്രാമും പ്രവർത്തനം ആരംഭിച്ചത് മുതൽ, സന്ദർശകർക്ക് സുരക്ഷിതവും വിശ്വസനീയവുമായ ഗതാഗതം വാഗ്‌ദാനം ചെയ്‌ത്‌ വിവിധ പരിപാടികളെ പിന്തുണയ്ക്കാൻ ഖത്തർ റെയിൽ കഠിനമായി പരിശ്രമിക്കുന്നു.
ഖത്തറിൻ്റെ വിനോദസഞ്ചാര മേഖല വികസിപ്പിക്കാൻ സഹായിക്കുന്നതിന്, ഗൈഡഡ് ടൂറുകൾ സംഘടിപ്പിക്കുന്ന കമ്പനിയായ സ്റ്റോപ്പ്ഓവർ ടൂറിസം എൽഎൽസിയുമായി ഖത്തർ റെയിൽ സഹകരിച്ചിട്ടുണ്ട്. ലോക ടൂറിസം ദിനത്തിന് തൊട്ടുമുമ്പ് അവർ അടുത്തിടെ മെട്രോയിൽ പ്രത്യേക ടൂറുകൾ ആരംഭിച്ചു. ഒരു പ്രൊഫഷണൽ ഗൈഡിൻ്റെ നേതൃത്വത്തിലുള്ള ഈ ടൂറുകൾ, ദോഹയിലെ പ്രധാന ആകർഷണങ്ങളായ മ്ഷൈറബ് സ്റ്റേഷൻ, നാഷണൽ മ്യൂസിയം, സൂഖ് വാഖിഫ് എന്നിവയിലേക്ക് സന്ദർശകരെ കൊണ്ടുപോകുന്നു.
കൂടാതെ, വിമാനത്താവളത്തിലെത്തുന്ന സന്ദർശകർക്ക് കോംപ്ലിമെൻ്ററി ഡേ പാസുകൾ നൽകുന്നതിനായി ഖത്തർ റെയിൽ ഹമദ് അന്താരാഷ്ട്ര വിമാനത്താവളവുമായി സഹകരിച്ച് പ്രവർത്തിക്കുന്നു. സെപ്റ്റംബർ 26 മുതൽ മൂന്ന് ദിവസത്തേക്ക് നടക്കുന്ന ഈ പ്രമോഷൻ, ദോഹ മെട്രോയും ലുസൈൽ ട്രാമും ഉപയോഗിക്കാൻ വിനോദസഞ്ചാരികളെ പ്രോത്സാഹിപ്പിക്കുന്നു, ഇത് വിവിധ ടൂറിസ്റ്റ് കേന്ദ്രങ്ങൾ സന്ദർശിക്കുന്നതും എളുപ്പമാക്കുന്നു.
