യുഎഇയിൽ പൊതുജനാരോഗ്യ സാഹചര്യം സുരക്ഷിതം; എബോള വൈറസ് പ്രതിരോധ പ്രവർത്തനങ്ങൾ വിലയിരുത്തി അധികൃതർ
അബുദാബി: എബോള വൈറസുമായി ബന്ധപ്പെട്ട ആഗോള സംഭവവികാസങ്ങൾ വിലയിരുത്തുകയും പ്രതിരോധ സജ്ജീകരണങ്ങൾ ശക്തമാക്കുകയും ചെയ്യുന്നതിനിടയിലും, യുഎഇയിലെ പൊതുജനാരോഗ്യ സാഹചര്യം തികച്ചും സുസ്ഥിരമായി തുടരുന്നതായി അധികൃതർ സ്ഥിരീകരിച്ചു.
ഉന്നതതല യോഗം ചേർന്നു
ആരോഗ്യ പ്രതിരോധ മന്ത്രി അഹമ്മദ് അലി അൽ സായിഗ്, നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്മെന്റ് അതോറിറ്റി എന്നിവരുടെ അധ്യക്ഷതയിൽ ചേർന്ന സംയുക്ത യോഗത്തിന് ശേഷമാണ് ഔദ്യോഗിക പ്രസ്താവന പുറത്തുവിട്ടത്. നിലവിലെ എപ്പിഡെമിയോളജിക്കൽ (രോഗവ്യാപന) സംഭവവികാസങ്ങളും സമൂഹത്തിന്റെ സുരക്ഷിതത്വം ഉറപ്പാക്കാൻ യുഎഇ സ്വീകരിച്ചിട്ടുള്ള മുൻകരുതൽ നടപടികളും യോഗം വിശദമായി അവലോകനം ചെയ്തു.
പ്രതിരോധ നടപടികൾ ശക്തം
രാജ്യത്തിന്റെ രോഗപ്രതിരോധ സംവിധാനങ്ങളും അടിയന്തിര സാഹചര്യങ്ങളെ നേരിടാനുള്ള സജ്ജീകരണങ്ങളും സജീവവും ഫലപ്രദവുമായി തുടരുകയാണെന്ന് അധികൃതർ എടുത്തുപറഞ്ഞു. നിലവിലെ സാഹചര്യം മുൻനിർത്തി യുഎഇ പൗരന്മാരും താമസക്കാരും ഉഗാണ്ട, ഡെമോക്രാറ്റിക് റിപ്പബ്ലിക് ഓഫ് കോംഗോ, ദക്ഷിണ സുഡാൻ എന്നീ രാജ്യങ്ങളിലേക്കുള്ള അത്യാവശ്യമല്ലാത്ത യാത്രകൾ ഒഴിവാക്കണമെന്ന് വിദേശകാര്യ മന്ത്രാലയം നേരത്തെ തന്നെ നിർദ്ദേശം നൽകിയിട്ടുണ്ട്.
