ദോഹ: ഖത്തറിൽ ഖത്തരി പൗരന്മാരല്ലാത്തവർക്ക് റിയൽ എസ്റ്റേറ്റ് ഉടമസ്ഥാവകാശവും ഉപയോഗാവകാശവും അനുവദിക്കുന്ന മേഖലകളുടെ പട്ടിക രാജ്യം പുതുക്കി നിശ്ചയിച്ചു. 2020-ലെ റസല്യൂഷൻ നമ്പർ (28)-ലെ ചില വ്യവസ്ഥകൾ ഭേദഗതി ചെയ്തുകൊണ്ട്, 2026-ലെ കാബിനറ്റ് റസല്യൂഷൻ നമ്പർ (21) പ്രകാരമാണ് ഈ നടപടി. ഇതിനായുള്ള നിബന്ധനകൾ, നിയന്ത്രണങ്ങൾ, ആനുകൂല്യങ്ങൾ, നടപടിക്രമങ്ങൾ എന്നിവയും പുതിയ ഉത്തരവ് വ്യക്തമാക്കുന്നു.
ഈ റസല്യൂഷനിലെ ആർട്ടിക്കിൾ (2) അനുസരിച്ച്, റിയൽ എസ്റ്റേറ്റ് ഉടമസ്ഥാവകാശം, ഉപയോഗാവകാശം, അനുബന്ധ ഇടപാടുകൾ എന്നിവയുടെ രജിസ്ട്രേഷനുമായി ബന്ധപ്പെട്ട എല്ലാ നടപടികളും നിലവിലുള്ള നിയമങ്ങൾക്കും ചട്ടങ്ങൾക്കും വിധേയമായി നീതിന്യായ മന്ത്രാലയത്തിന് കീഴിലുള്ള റിയൽ എസ്റ്റേറ്റ് രജിസ്ട്രേഷൻ ഡിപ്പാർട്ട്മെന്റ് നിർവ്വഹിക്കേണ്ടതാണ്.
കൂടാതെ, ആർട്ടിക്കിൾ (3) പ്രകാരം മുൻപത്തെ ടേബിളിനോടൊപ്പമുള്ള പ്ലാനിംഗ്, കാഡസ്ട്രൽ മാപ്പുകൾ എന്നിവയിലും മാറ്റങ്ങൾ വരുത്തിയിട്ടുണ്ട്. ഗസറ്റിൽ പ്രസിദ്ധീകരിച്ചതിന്റെ തൊട്ടടുത്ത ദിവസം മുതൽ ഈ ഉത്തരവ് പ്രാബല്യത്തിൽ വന്നതായി ആർട്ടിക്കിൾ (4) വ്യക്തമാക്കുന്നു.
വിദേശികൾക്ക് അനുമതിയുള്ള 10 മേഖലകൾ
പുതുക്കിയ പട്ടിക പ്രകാരം ഖത്തരികളല്ലാത്തവർക്ക് റിയൽ എസ്റ്റേറ്റ് സ്വന്തമാക്കാൻ അനുമതിയുള്ള 10 നിർദ്ദിഷ്ട മേഖലകൾ താഴെ പറയുന്നവയാണ്:
- വെസ്റ്റ് ബേ (ലെഗ്തൈഫിയ ഏരിയ – സോൺ 66)
- ദി പേൾ ഐലൻഡ് (സോൺ 66)
- അൽ ഖോർ റിസോർട്ട് (സോൺ 74)
- ദഫ്ന (അഡ്മിനിസ്ട്രേറ്റീവ് ഏരിയ – സോൺ 60)
- ദഫ്ന (അഡ്മിനിസ്ട്രേറ്റീവ് ഏരിയ – സോൺ 61)
- ഒനൈസ (അഡ്മിനിസ്ട്രേറ്റീവ് ഏരിയ – സോൺ 63)
- ലുസൈൽ (സോൺ 69)
- അൽ ഖരായെജ് (സോൺ 69)
- ജബൽ ഥുവൈലബ് (സോൺ 69)
- സിമൈസ്മ റിസോർട്ട് ആൻഡ് ബീച്ച് പ്രോജക്ട് (സോൺ 70)
