ഹജ്ജ്, ബലിപെരുന്നാൾ സീസൺ: യാത്രക്കാർക്കായി ഹമദ് അന്താരാഷ്ട്ര വിമാനത്താവളം പുതിയ മാർഗ്ഗനിർദ്ദേശങ്ങൾ പുറത്തിറക്കി

ബലിപെരുന്നാൾ അവധിക്കാലവും ഹജ്ജ് സീസണും പ്രമാണിച്ച് ദോഹയിലെത്തുന്ന യാത്രക്കാരുടെ വരവ് സുഗമമാക്കുന്നതിനായി ഹമദ് അന്താരാഷ്ട്ര വിമാനത്താവളം (HIA) വിപുലമായ പ്രവർത്തന ക്രമീകരണങ്ങളും മാർഗ്ഗനിർദ്ദേശങ്ങളും പ്രഖ്യാപിച്ചു. എമിഗ്രേഷൻ, ലഗേജ് സേവനങ്ങൾ, ഉപരിതല ഗതാഗതം എന്നിവയുമായി ബന്ധപ്പെട്ട നിർദ്ദേശങ്ങളാണ് വിമാനത്താവള അധികൃതർ പുറത്തുവിട്ടിട്ടുള്ളത്.

എമിഗ്രേഷൻ (Immigration)

• വേഗത്തിലുള്ള എമിഗ്രേഷൻ നടപടികൾക്കായി അർഹരായ യാത്രക്കാർ അറൈവൽ എമിഗ്രേഷൻ ഹാളിലുള്ള ‘സ്കാൻ ആൻഡ് ഗോ’ (Scan & Go) ഇ-ഗേറ്റുകൾ ഉപയോഗിക്കാൻ പ്രോത്സാഹിപ്പിക്കുന്നു.
• ഈ സേവനം ഉപയോഗിക്കുന്നതിനുള്ള കുറഞ്ഞ ഉയരപരിധി 130 സെന്റിമീറ്റർ ആയി നിശ്ചയിച്ചിട്ടുണ്ട്.

ലഗേജ് സേവനങ്ങൾ (Baggage)

• വീൽചെയറുകൾ, ബേബി സ്ട്രോളറുകൾ ഉൾപ്പെടെയുള്ള വലിയ വലിപ്പത്തിലുള്ളതോ (Oversized) പ്രത്യേക ആകൃതിയിലുള്ളതോ ആയ ലഗേജുകൾ ഇതിനായി പ്രത്യേകം സജ്ജീകരിച്ചിരിക്കുന്ന റീക്ലെയിം ബെൽറ്റ് A, B എന്നിവയിലൂടെയായിരിക്കും യാത്രക്കാർക്ക് ലഭിക്കുക.
• ഹജ്ജ് കഴിഞ്ഞ് മടങ്ങുന്ന തീർത്ഥാടകരുടെ സംസം വെള്ളം (Zamzam water) പ്രത്യേക ബെൽറ്റുകൾ വഴി വിതരണം ചെയ്യും. ഇതിനായി യാത്രക്കാരെ സഹായിക്കാൻ ജീവനക്കാരുടെ സേവനവും ലഭ്യമായിരിക്കും.
• എളുപ്പത്തിൽ കേടുപാടുകൾ സംഭവിക്കാൻ സാധ്യതയുള്ള സാധനങ്ങൾ (Fragile items) ഹാർഡ്-ഷെൽ പെട്ടികളിൽ സുരക്ഷിതമായി പാക്ക് ചെയ്യാൻ ശ്രദ്ധിക്കുക. ലഗേജ് റീക്ലെയിം ഏരിയ വിടുന്നതിന് മുൻപ് ബാഗുകൾ തങ്ങളുടേത് തന്നെയാണെന്ന് ഉറപ്പുവരുത്തണമെന്നും താമസസ്ഥലത്ത് എത്തുന്നതുവരെ ബാഗേജ് ടാഗുകൾ സൂക്ഷിച്ചുവെക്കണമെന്നും നിർദ്ദേശമുണ്ട്.
• ലഗേജുകളുമായി ബന്ധപ്പെട്ട എന്തെങ്കിലും സഹായം ആവശ്യമുള്ളവർക്ക് അറൈവൽ ഹാളിലുള്ള ബാഗേജ് സർവീസസ് ഓഫീസുമായി ബന്ധപ്പെടാവുന്നതാണ്.

ഉപരിതല ഗതാഗത സൗകര്യങ്ങൾ (Ground Transport)

വിമാനത്താവളത്തിൽ നിന്നു ദോഹയുടെ വിവിധ ഭാഗങ്ങളിലേക്ക് പോകുന്നതിനായി മികച്ച ഗതാഗത സംവിധാനങ്ങൾ ഒരുക്കിയിട്ടുണ്ട്:

• ബസ് & ടാക്സി: അറൈവൽ ഹാളിന്റെ ഇരുവശങ്ങളിലുമായി ബസ് പവലിയനും ടാക്സി പവലിയനും സ്ഥിതി ചെയ്യുന്നു.
• റൈഡ്-ഷെയറിംഗ് സേവനങ്ങൾ: യൂബർ (Uber), ബദ്‌ർഗോ (Badrgo), റൈഡ് (Ryde) തുടങ്ങിയ അംഗീകൃത ടാക്സി ആപ്പ് സേവനങ്ങൾ മൾട്ടി ലെവൽ പാർക്കിംഗ് ഏരിയയിൽ പ്രത്യേകം സജ്ജമാക്കിയ പിക്ക്-അപ്പ് പോയിന്റിൽ ലഭ്യമാണ്.
• ദോഹ മെട്രോ: ടെർമിനലിൽ നിന്ന് അല്പം മാത്രം നടക്കാവുന്ന ദൂരത്തിൽ വിമാനത്താവളത്തിനുള്ളിൽ തന്നെ മെട്രോ സ്റ്റേഷൻ ലഭ്യമാണ്. പുതുക്കിയ സമയവിവരങ്ങൾ അറിയാൻ യാത്രക്കാർ ദോഹ മെട്രോ വെബ്സൈറ്റ് സന്ദർശിക്കേണ്ടതാണ്.
• മറ്റ് സേവനങ്ങൾ: കാർ റെന്റൽ, ലിമോസിൻ സർവീസുകൾ എന്നിവയ്ക്ക് പുറമെ ഡിപ്പാർച്ചർ, അറൈവൽ ഭാഗങ്ങളിൽ വാലെ (Valet) പാർക്കിംഗ് സേവനവും ലഭ്യമാണ്.

യാത്രക്കാരെ പിക്ക് ചെയ്യാൻ എത്തുന്നവർക്കുള്ള നിർദ്ദേശം (Passenger Pick-up)

യാത്രക്കാരുടെ തിരക്ക് കൂടുതലുള്ള സമയങ്ങളിൽ വിമാനത്താവളത്തിൽ എത്തുന്ന ഡ്രൈവർമാർ എയർപോർട്ട് പാർക്കിംഗ് സൗകര്യം നിർബന്ധമായും ഉപയോഗിക്കേണ്ടതാണ്. ടെർമിനലിന് പുറത്ത് വാഹനങ്ങൾ നിർത്തിയിട്ട് പോകാൻ പാടുള്ളതല്ല. ഇത് ഗതാഗതക്കുരുക്കിന് കാരണമാകുമെന്നതിനാലും ട്രാഫിക് നിയമലംഘനമായി കണക്കാക്കി വാഹനങ്ങൾ അധികൃതർ റിക്കവറി വാഹനം ഉപയോഗിച്ച് മാറ്റിസ്ഥാപിക്കുമെന്നതിനാലും (Towing) ഡ്രൈവർമാർ ജാഗ്രത പാലിക്കുക.