ദോഹ: ഖത്തറിന്റെ വ്യോമപാത അടച്ചെന്നോ വിമാന സർവീസുകൾ നിർത്തിവെച്ചെന്നോ ഉള്ള രീതിയിൽ സോഷ്യൽ മീഡിയയിൽ പ്രചരിക്കുന്ന വാർത്തകൾ ഖത്തർ സിവിൽ ഏവിയേഷൻ അതോറിറ്റി (QCAA) നിഷേധിച്ചു. പ്രചരിക്കുന്ന വിവരങ്ങൾ തെറ്റാണെന്ന് പ്രസ്താവനയിലൂടെ സ്ഥിരീകരിച്ച അതോറിറ്റി, ഏവിയേഷൻ സർവീസുകളുമായി ബന്ധപ്പെട്ട അപ്ഡേറ്റുകൾക്കായി ഔദ്യോഗിക സ്രോതസ്സുകളെ മാത്രം ആശ്രയിക്കാൻ പൊതുജനങ്ങളോട് ആവശ്യപ്പെട്ടു.
നോട്ടാം (NOTAM) വ്യക്തമാക്കുന്നത്
അതോറിറ്റി നിലവിൽ പുറപ്പെടുവിച്ചിട്ടുള്ള നോട്ടീസ് ടു എയർമെൻ (NOTAM), സുരക്ഷയും കാര്യക്ഷമതയും ഉറപ്പാക്കിക്കൊണ്ട് എയർ നാവിഗേഷൻ സേവനങ്ങൾ തുടർച്ചയായി നൽകുന്നതിന് വേണ്ടിയുള്ള ബദൽ വ്യോമപാതകൾ അടയാളപ്പെടുത്താൻ ഉദ്ദേശിച്ചുള്ളതാണെന്ന് ക്യുസിഎഎ വ്യക്തമാക്കി. നിലവിലെ സാഹചര്യങ്ങളും അന്താരാഷ്ട്രതലത്തിൽ അംഗീകരിക്കപ്പെട്ട വ്യോമയാന മാനദണ്ഡങ്ങളും മുൻനിർത്തിയാണ് ഈ നടപടി സ്വീകരിച്ചിട്ടുള്ളത്.
സർവീസുകൾ സാധാരണ നിലയിൽ
എയർ നാവിഗേഷൻ സേവനങ്ങൾ സാധാരണ നിലയിൽ തുടർന്നും പ്രവർത്തിക്കുന്നുണ്ടെന്ന് അതോറിറ്റി ഊന്നിപ്പറഞ്ഞു. നിലവിലെ നോട്ടാം (NOTAM) വ്യോമപാത അടയ്ക്കുന്നതിനെയോ സർവീസുകൾ നിർത്തിവെക്കുന്നതിനെയോ സൂചിപ്പിക്കുന്നില്ല. വ്യാജവാർത്തകൾ പ്രചരിപ്പിക്കുന്നതിൽ നിന്നും സ്ഥിരീകരിക്കാത്ത വിവരങ്ങൾ പങ്കുവെക്കുന്നതിൽ നിന്നും പിന്മാറണമെന്നും ഔദ്യോഗിക ചാനലുകളിൽ നിന്ന് മാത്രം വിവരങ്ങൾ ശേഖരിക്കണമെന്നും ക്യുസിഎഎ പൊതുജനങ്ങളോട് അഭ്യർത്ഥിച്ചു.
