ബലിപെരുന്നാളിന് മുന്നോടിയായി മൃഗങ്ങളുടെ പൊതുലേലം സംഘടിപ്പിക്കാൻ ഒരുങ്ങി ഖത്തർ നഗരസഭ മന്ത്രാലയം. മേജർ ടെൻഡർ ആൻഡ് ഓക്ഷൻ കമ്മിറ്റിയുടെ നേതൃത്വത്തിലാണ് ലേലം നടക്കുന്നത്. 2026 മെയ് 16 ശനിയാഴ്ച രാവിലെ 7 മണിക്കാണ് ലേലം നിശ്ചയിച്ചിരിക്കുന്നത്.
ലേലം നടക്കുന്ന സ്ഥലം
അൽ ഷഹാനിയ അനിമൽ പ്രൊഡക്ഷൻ റിസർച്ച് സ്റ്റേഷനിൽ (ബിൽഡിംഗ് 2335, സ്ട്രീറ്റ് നമ്പർ 373, സോൺ 80) വെച്ചാണ് ലേലം നടക്കുക. ലേലം നടക്കുന്ന ദിവസം രാവിലെ 6 മണി മുതൽ പ്രവേശനം അനുവദിക്കും.
പരിശോധനാ സമയം
ലേലത്തിന് വെക്കുന്ന മൃഗങ്ങളെ മുൻകൂട്ടി കാണാനും പരിശോധിക്കാനും താല്പര്യമുള്ളവർക്ക് മെയ് 7 മുതൽ 14 വരെ അവസരമുണ്ട്. വെള്ളിയാഴ്ചയും ശനിയാഴ്ചയും ഒഴികെയുള്ള ദിവസങ്ങളിൽ രാവിലെ 8 മണി മുതൽ ഉച്ചയ്ക്ക് 1 മണി വരെയാണ് പരിശോധന അനുവദിക്കുക.
ആവശ്യമായ രേഖകൾ
ലേലത്തിൽ പങ്കെടുക്കാൻ ആഗ്രഹിക്കുന്നവർ താഴെ പറയുന്ന രേഖകൾ ഹാജരാക്കേണ്ടതുണ്ട്:
- ഒറിജിനൽ ഖത്തർ ഐഡി (QID)
- കമ്പനികളെ പ്രതിനിധീകരിക്കുന്ന വ്യക്തികൾക്കാണെങ്കിൽ കമ്പനിയിൽ നിന്നുള്ള അംഗീകാര പത്രം
- ഫാം ലൈസൻസ് (Farm license)
- കന്നുകാലി വ്യാപാരം ഉൾപ്പെടുത്തിയ കൊമേഴ്സ്യൽ രജിസ്ട്രേഷൻ (CR)
- ഒറിജിനൽ എസ്റ്റാബ്ലിഷ്മെന്റ് രജിസ്ട്രേഷൻ
- മുകളിൽ പറഞ്ഞിരിക്കുന്ന എല്ലാ രേഖകളുടെയും കോപ്പികൾ
