ആഗോള യാത്രാ ശൃംഖല പുനഃസ്ഥാപിക്കുന്നതിന്റെ ഭാഗമായി കോഴിക്കോട് (CCJ), ബഹ്റൈൻ (BAH) എന്നിവിടങ്ങളിലേക്ക് മെയ് 1 മുതൽ ഖത്തർ എയർവേയ്സ് പ്രതിദിന സർവീസുകൾ ആരംഭിക്കുന്നു. നേരത്തെ ദുബായ്, ഷാർജ (ഏപ്രിൽ 23 മുതൽ), ഡമാസ്കസ് (മെയ് 1 മുതൽ) എന്നിവിടങ്ങളിലേക്കുള്ള സർവീസുകൾ പുനരാരംഭിക്കുമെന്ന് എയർലൈൻ അറിയിച്ചിരുന്നു. മിഡിൽ ഈസ്റ്റിലും ആറ് ഭൂഖണ്ഡങ്ങളിലുമുള്ള പ്രധാന വിപണികളിലേക്ക് യാത്രക്കാർക്ക് കൂടുതൽ കണക്റ്റിവിറ്റി നൽകാനാണ് ഇതിലൂടെ ലക്ഷ്യമിടുന്നത്.
യാത്രക്കാർക്കുള്ള ഇളവുകൾ
ഏപ്രിൽ 30-നകം ടിക്കറ്റുകൾ എടുത്തവർക്കും ഫെബ്രുവരി 28 നും സെപ്റ്റംബർ 15 നും ഇടയിൽ യാത്രാ തീയതിയുള്ളവർക്കും പ്രത്യേക ആനുകൂല്യങ്ങൾ എയർലൈൻ പ്രഖ്യാപിച്ചിട്ടുണ്ട്:
- ഒക്ടോബർ 31 വരെയുള്ള പുതിയ തീയതികളിലേക്ക് സൗജന്യമായി ടിക്കറ്റ് മാറ്റാം (ലഭ്യതയ്ക്കും സീസണൽ നിരക്കുകൾക്കും വിധേയം).
- ഉപയോഗിക്കാത്ത ടിക്കറ്റുകൾക്ക് റീഫണ്ട് അനുവദിക്കും (28 പ്രവൃത്തി ദിവസത്തിനുള്ളിൽ പ്രോസസ്സ് ചെയ്യും).
വിമാന സർവീസുകളെ അപ്രതീക്ഷിതമായി ബാധിക്കുന്ന സാഹചര്യങ്ങളിൽ, ഒക്ടോബർ 31 വരെയുള്ള യാത്രകൾക്ക് അധിക നിരക്കുകൾ ഇല്ലാതെ തന്നെ ഒരേ ക്യാബിനിൽ തീയതി മാറ്റം അനുവദിക്കും. പിഴയില്ലാതെ റീഫണ്ടും ലഭ്യമാകും.
പ്രധാന അറിയിപ്പ്
.യാത്രക്കാർ എയർലൈനിന്റെ ഔദ്യോഗിക വെബ്സൈറ്റോ ആപ്പോ വഴി വിവരങ്ങൾ പതിവായി പരിശോധിക്കണമെന്ന് ഖത്തർ എയർവേയ്സ് നിർദ്ദേശിച്ചു. പ്രവർത്തനപരമോ സുരക്ഷാപരമോ ആയ കാരണങ്ങളാൽ വിമാന ഷെഡ്യൂളുകളിൽ മാറ്റങ്ങളോ റദ്ദാക്കലുകളോ ഉണ്ടാകാൻ സാധ്യതയുണ്ടെന്നും അധികൃതർ അറിയിച്ചു.
