മേഖലയിലെ സംഘർഷം: ആഗോള പ്രദർശനങ്ങളിൽ നിന്നും അവാർഡ് പരിപാടികളിൽ നിന്നും ഹമദ് അന്താരാഷ്ട്ര വിമാനത്താവളം പിന്മാറി

​ദോഹ, ഖത്തർ: പശ്ചിമേഷ്യയിൽ തുടരുന്ന യുദ്ധസമാനമായ സാഹചര്യത്തെത്തുടർന്ന് പ്രമുഖ അന്താരാഷ്ട്ര പ്രദർശനങ്ങളിൽ നിന്നും അവാർഡ് പരിപാടികളിൽ നിന്നും പിന്മാറുന്നതായി ഖത്തറിലെ ഹമദ് അന്താരാഷ്ട്ര വിമാനത്താവളം (HIA) അറിയിച്ചു. ചൊവ്വാഴ്ച (2026 മാർച്ച് 17) പുറത്തിറക്കിയ ഔദ്യോഗിക പ്രസ്താവനയിലൂടെയാണ് വിമാനത്താവള അധികൃതർ ഇക്കാര്യം വ്യക്തമാക്കിയത്.

​ലണ്ടനിൽ നടക്കാനിരിക്കുന്ന സ്കൈട്രാക്സ് വേൾഡ് എയർപോർട്ട് അവാർഡ്സ് 2026 (Skytrax World Airport Awards 2026), പാസഞ്ചർ ടെർമിനൽ എക്‌സ്‌പോ 2026 (Passenger Terminal Expo 2026) എന്നിവയുൾപ്പെടെയുള്ള ആഗോള പരിപാടികളിൽ നിന്നാണ് വിമാനത്താവളം വിട്ടുനിൽക്കുന്നത്. മേഖലയിലെ നിലവിലെ സുരക്ഷാ വെല്ലുവിളികൾ കണക്കിലെടുത്താണ് ഈ തീരുമാനം.

​”യാത്രക്കാരുടെയും ജീവനക്കാരുടെയും അവരുടെ കുടുംബങ്ങളുടെയും സുരക്ഷയ്ക്കാണ് ഞങ്ങൾ എന്നും മുൻഗണന നൽകുന്നത്. നിലവിലെ സാഹചര്യത്തിൽ അവരുടെ ക്ഷേമം ഉറപ്പാക്കുന്നതിനാണ് ഈ തീരുമാനമെടുത്തിരിക്കുന്നത്,” ഹമദ് അന്താരാഷ്ട്ര വിമാനത്താവളം പ്രസ്താവനയിൽ പറഞ്ഞു.