ഖത്തർ ജനറൽ ടാക്സ് അതോറിറ്റിയുടെ (GTA) പേരിൽ പ്രചരിക്കുന്ന വ്യാജ സന്ദേശങ്ങൾക്കും സംശയാസ്പദമായ ലിങ്കുകൾക്കുമെതിരെ പൊതുജനങ്ങൾ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. നികുതി സംബന്ധമായ കാര്യങ്ങൾക്കെന്ന വ്യാജേന വ്യക്തിഗത വിവരങ്ങളും ബാങ്ക് അക്കൗണ്ട് വിവരങ്ങളും തട്ടിയെടുക്കാൻ ലക്ഷ്യമിട്ടുള്ള സൈബർ ചതിക്കുഴികൾ വർദ്ധിച്ചുവരുന്ന സാഹചര്യത്തിലാണ് ഈ നിർദ്ദേശം.
അതോറിറ്റിയുടേതെന്ന രീതിയിൽ വരുന്ന എസ്എംഎസുകളിലെയും ഇമെയിലുകളിലെയും ലിങ്കുകളിൽ ക്ലിക്ക് ചെയ്യരുതെന്ന് ജിടിഎ ഔദ്യോഗിക പ്രസ്താവനയിൽ അറിയിച്ചു. നികുതി റീഫണ്ട് നൽകാനെന്നോ പിഴയൊടുക്കാനെന്നോ പറഞ്ഞ് വരുന്ന ഇത്തരം സന്ദേശങ്ങൾ വഴി ഉപഭോക്താക്കളുടെ പാസ്വേഡുകളും സാമ്പത്തിക വിവരങ്ങളും ചോർത്താൻ സാധ്യതയുണ്ട്. ഔദ്യോഗികമായ അറിയിപ്പുകൾ മന്ത്രാലയത്തിന്റെ അംഗീകൃത പ്ലാറ്റ്ഫോമുകൾ വഴി മാത്രമേ ലഭിക്കുകയുള്ളൂ.
സംശയാസ്പദമായ എന്തെങ്കിലും സന്ദേശങ്ങൾ ലഭിക്കുകയാണെങ്കിൽ ഉടൻ തന്നെ അധികൃതരെ വിവരമറിയിക്കണമെന്നും ഔദ്യോഗിക വെബ്സൈറ്റോ ആപ്പുകളോ മാത്രം ഇടപാടുകൾക്കായി ഉപയോഗിക്കണമെന്നും അതോറിറ്റി വ്യക്തമാക്കി. സൈബർ സുരക്ഷ ഉറപ്പാക്കുന്നതിന്റെ ഭാഗമായി അപരിചിതമായ സ്രോതസ്സുകളിൽ നിന്ന് വരുന്ന ലിങ്കുകൾ തുറക്കരുതെന്നും ജിടിഎ പൊതുജനങ്ങളെ ഓർമ്മിപ്പിച്ചു.
