ഖത്തറിൽ ജൂൺ മാസത്തെ കാലാവസ്ഥാ ഗൈഡ് പുറത്തുവിട്ടു; വർഷത്തിലെ ഏറ്റവും ചൂടുകൂടിയ മൂന്നാമത്തെ മാസം

ദോഹ: ഖത്തർ കാലാവസ്ഥാ വകുപ്പ് ജൂൺ മാസത്തെ കാലാവസ്ഥാ ഗൈഡ് പുറത്തുവിട്ടു. വേനൽക്കാലത്തിന്റെ ആദ്യ മാസമായ ജൂൺ, ദോഹയിൽ വർഷത്തിലെ ഏറ്റവും ചൂടുകൂടിയ മൂന്നാമത്തെ മാസമാണ്.

ശരാശരി താപനിലയും മുൻ റെക്കോർഡുകളും

ഈ മാസത്തിലെ ശരാശരി പ്രതിദിന താപനില 34.7°C ആണ്. ജൂൺ മാസത്തിൽ രേഖപ്പെടുത്തിയിട്ടുള്ളതിൽ വെച്ച് ഏറ്റവും കുറഞ്ഞ താപനില 1975-ൽ രേഖപ്പെടുത്തിയ 21°C ഉം, ഏറ്റവും ഉയർന്ന താപനില 2010-ൽ രേഖപ്പെടുത്തിയ 49.1°C ഉം ആണ്.

ശക്തമായ കാറ്റിനും പൊടിപടലങ്ങൾക്കും സാധ്യത

ജൂൺ മാസത്തിൽ സാധാരണയായി ശക്തമായ വടക്കുപടിഞ്ഞാറൻ കാറ്റ് വീശാറുണ്ട്. ഈ കാറ്റ് കാരണം അന്തരീക്ഷത്തിൽ പൊടിപടലങ്ങൾ ഉയരാനും, കാഴ്ചപരിധി കുറയാനും, ഉയർന്ന തിരമാലകൾ ഉണ്ടാകാനും സാധ്യതയുണ്ട്. കാറ്റിന്റെ വേഗത പൊതുവെ പകൽ സമയങ്ങളിൽ കൂടുതലായിരിക്കുമെന്നും വൈകുന്നേരത്തോടെ ഇത് കുറയുമെന്നും കാലാവസ്ഥാ ഗൈഡിൽ വ്യക്തമാക്കുന്നു.