യുഎഇ സ്വദേശി വേഷം പരസ്യങ്ങൾക്ക് ഉപയോഗിക്കുന്നതിൽ നിയന്ത്രണം; ലംഘിച്ചാൽ കർശന നടപടി

യുഎഇയുടെ ദേശീയതയുടെ അടയാളമായ സ്വദേശി വേഷം (കന്ദുറയും ഗുത്രയും) സാമൂഹിക മാധ്യമങ്ങളിലെ പരസ്യങ്ങൾക്കും വാണിജ്യ ആവശ്യങ്ങൾക്കും ദുരുപയോഗം ചെയ്യുന്നത് തടയാൻ യുഎഇ കർശന നടപടി സ്വീകരിക്കുന്നു. സ്വദേശി വേഷം ധരിച്ച് ഉൽപ്പന്നങ്ങൾ പ്രമോട്ട് ചെയ്യുന്നവർ ഇനിമുതൽ യുഎഇ പൗരന്മാരായിരിക്കണം എന്ന നിബന്ധന അധികൃതർ കർശനമാക്കി.

സാംസ്കാരിക മൂല്യങ്ങളുടെ സംരക്ഷണം

പരസ്യങ്ങളിൽ സ്വദേശി വേഷം ധരിച്ചെത്തുന്നവർ തെറ്റായ രീതിയിൽ സംസാരിക്കുന്നതും തദ്ദേശീയമല്ലാത്ത ഭാഷാശൈലി ഉപയോഗിക്കുന്നതും ജനങ്ങൾക്കിടയിൽ വലിയ പ്രതിഷേധത്തിന് ഇടയാക്കിയിരുന്നു. പ്രത്യേകിച്ചും റിയൽ എസ്റ്റേറ്റ് പരസ്യങ്ങളിലും മറ്റും സ്വദേശി വേഷം ധരിച്ച്, എന്നാൽ തനിമയില്ലാത്ത ഭാഷ സംസാരിക്കുന്നത് സ്വദേശികളുടെ വികാരത്തെ മുറിപ്പെടുത്തുന്നതായി അധികൃതർ ചൂണ്ടിക്കാട്ടി. കാർ ഷോറൂമുകളിലും മറ്റും പണവുമായി അനാവശ്യ പ്രദർശനം നടത്തുന്ന രീതിയിലുള്ള പരസ്യങ്ങളും അധികൃതരുടെ ശ്രദ്ധയിൽപ്പെട്ടിട്ടുണ്ട്. ഇത് യുഎഇയുടെ മൂല്യങ്ങൾക്കും സംസ്കാരത്തിനും വിരുദ്ധമാണെന്ന് അധികൃതർ നിരീക്ഷിച്ചു.

നിയമത്തിന്റെ പശ്ചാത്തലം

കഴിഞ്ഞ വർഷം ഏപ്രിലിൽ ഫെഡറൽ നാഷണൽ കൗൺസിലിൽ (എഫ്എൻസി) ഉയർന്ന ചർച്ചകളുടെ തുടർച്ചയായാണ് ഈ പോളിസി വരുന്നത്. മറ്റ് രാജ്യക്കാരെയും അവരുടെ വസ്ത്രധാരണ രീതികളെയും രാജ്യം പൂർണ്ണമായും ബഹുമാനിക്കുന്നുണ്ടെന്നും എന്നാൽ സ്വദേശി വേഷം ധരിച്ച് തെറ്റായ സന്ദേശങ്ങൾ നൽകുന്നത് അംഗീകരിക്കാനാവില്ലെന്നും നാഷണൽ മീഡിയ ഓഫീസ് ചെയർമാൻ അബ്ദുള്ള ബിൻ മുഹമ്മദ് ബിൻ ബൂട്ടി അൽ ഹാമിദ് പറഞ്ഞു.

സ്വദേശി വേഷം രാജ്യത്തിന്റെ അഭിമാനം

സ്വദേശി വേഷം എന്നത് കേവലം ഒരു വസ്ത്രമല്ല, മറിച്ച് രാജ്യത്തിന്റെ ചരിത്രത്തോടും സംസ്കാരത്തോടും ചേർന്നുനിൽക്കുന്ന വികാരമാണെന്ന് അബ്ദുള്ള ബിൻ മുഹമ്മദ് ബിൻ ബൂട്ടി അൽ ഹാമിദ് വ്യക്തമാക്കി. പാരമ്പര്യത്തിന്റെ തനിമ കാത്തുസൂക്ഷിച്ചുകൊണ്ട് തന്നെ ആത്മവിശ്വാസത്തോടെ ഭാവിയെ നോക്കിക്കാണുന്ന ഒരു ജനതയുടെ അഭിമാനമാണ് ഇതിലൂടെ പ്രതിഫലിക്കുന്നത്. പുതിയ നിയമം വരുന്നതോടെ, യുഎഇയുടെ ആചാരങ്ങളും മര്യാദകളും ശരിയായ രീതിയിൽ മാത്രമേ പൊതുസമൂഹത്തിന് മുന്നിലെത്തുകയുള്ളൂ.