രാജ്യത്തെ ഗതാഗത സൗകര്യങ്ങൾ അത്യാധുനികമാക്കുന്നതിന്റെ ഭാഗമായി ഖത്തർ ഗതാഗത മന്ത്രാലയം (Ministry of Transport) ‘ഖത്തർ 2050 ട്രാൻസ്പോർട്ടേഷൻ മാസ്റ്റർ പ്ലാൻ’ പരിഷ്കരിച്ചു. ഇതിൽ പ്രധാനമായും ശ്രദ്ധ കേന്ദ്രീകരിക്കുന്നത് രാജ്യത്തെ പ്രധാന തീരദേശ മേഖലകളെ തമ്മിൽ ബന്ധിപ്പിക്കുന്ന ജലഗതാഗത ലൈനുകൾക്കാണ്.
അൽ ഖോർ വരെ നീളുന്ന ഫെറി സർവീസുകൾ
ജനവാസ മേഖലകൾ, വാണിജ്യ കേന്ദ്രങ്ങൾ, വിനോദസഞ്ചാര കേന്ദ്രങ്ങൾ എന്നിവയെ ദോഹയുമായും വെസ്റ്റ് ബേയുമായും എളുപ്പത്തിൽ ബന്ധിപ്പിക്കാനാണ് പുതിയ പദ്ധതി ലക്ഷ്യമിടുന്നത്. നേരത്തെ ദോഹ പോർട്ട് മുതൽ ലുസൈൽ വരെയായിരുന്ന ജലഗതാഗത പദ്ധതി, ഇപ്പോൾ വടക്കൻ മേഖലയായ അൽ ഖോർ (Al Khor) വരെ വ്യാപിപ്പിക്കാനാണ് പുതിയ തീരുമാനം.
മൂന്ന് പ്രധാന ജലഗതാഗത ലൈനുകൾ
പുതുക്കിയ മാസ്റ്റർ പ്ലാൻ പ്രകാരം മൂന്ന് പ്രധാന റൂട്ടുകളാണ് വിഭാവനം ചെയ്തിരിക്കുന്നത്:
- അൽ ഖോർ വാട്ടർ ട്രാൻസ്പോർട്ട് ലൈൻ (Al Khor Water Transport Line)
- എച്ച്.ഐ.എ വാട്ടർ ട്രാൻസ്പോർട്ട് ലൈൻ (HIA Water Transport Line)
- അൽ വക്ര ട്രാൻസ്പോർട്ട് ലൈൻ (Al Wakrah Transport Line)
ഹമദ് പോർട്ടും ദോഹ പോർട്ടും തമ്മിലുള്ള ബന്ധം
ഹമദ് പോർട്ടിനെയും ദോഹ പോർട്ടിനെയും തമ്മിൽ ബന്ധിപ്പിക്കുന്ന തുടർച്ചയായ പാസഞ്ചർ ഫെറി സർവീസുകളാണ് ആദ്യഘട്ടത്തിൽ നിർദ്ദേശിക്കപ്പെട്ടിട്ടുള്ളത്. ഇതിൽ ഹമദ് അന്താരാഷ്ട്ര വിമാനത്താവളം (HIA), അൽ വക്ര (Al Wakrah), ഉം അൽ ഹൗളിന് സമീപമുള്ള ഖത്തർ ഇക്കണോമിക് സോൺ 3 (QEZ 3) എന്നിവിടങ്ങളിൽ പുതിയ സ്റ്റോപ്പുകൾ ഉണ്ടാകും. തീരദേശ യാത്രക്കാർക്ക് കൂടുതൽ ആശ്വാസകരമാകുന്ന രീതിയിലാണ് ഈ പദ്ധതികൾ ആസൂത്രണം ചെയ്തിരിക്കുന്നത്.
