ജോലിസ്ഥലത്തെ സുരക്ഷയുടെ പ്രാധാന്യം ഓർമ്മിപ്പിച്ചു കൊണ്ട് ഖത്തർ പൊതുജനാരോഗ്യ മന്ത്രാലയം (MOPH) രംഗത്തെത്തി. സുരക്ഷിതമായ ജോലി സാഹചര്യം ഉറപ്പാക്കുക എന്നത് തൊഴിലുടമകളുടെയും തൊഴിലാളികളുടെയും പങ്കാളിത്ത ഉത്തരവാദിത്തമാണെന്ന് മന്ത്രാലയം വ്യക്തമാക്കി. ലോക തൊഴിൽ സുരക്ഷാ ദിനത്തോടനുബന്ധിച്ചാണ് (World Day for Safety and Health at Work) ആരോഗ്യകരമായ തൊഴിൽ ശീലങ്ങളെക്കുറിച്ചുള്ള ബോധവൽക്കരണം മന്ത്രാലയം നടത്തിയത്.
ഭാരമേറിയ വസ്തുക്കൾ ഉയർത്തുമ്പോൾ ശ്രദ്ധിക്കേണ്ടവ
ജോലിസ്ഥലത്തെ പരിക്കുകൾ കുറയ്ക്കുന്നതിനായി ശരിയായ രീതിയിൽ ഭാരം ഉയർത്തുന്നതിനുള്ള നിർദ്ദേശങ്ങൾ മന്ത്രാലയം പങ്കുവെച്ചു. ഭാരമുള്ള വസ്തുക്കൾ കൈകാര്യം ചെയ്യുമ്പോൾ നട്ടെല്ല് വളയ്ക്കുകയോ തിരിക്കുകയോ ചെയ്യുന്നത് ഒഴിവാക്കണം. ദിശ മാറുന്നതിനായി ശരീരം തിരിക്കുന്നതിന് പകരം പാദങ്ങൾ ചലിപ്പിക്കുന്നത് നടുവിനുണ്ടാകുന്ന സമ്മർദ്ദം കുറയ്ക്കാൻ സഹായിക്കും. കൂടാതെ, മികച്ച നിയന്ത്രണം ലഭിക്കുന്നതിനും അപകടങ്ങൾ ഒഴിവാക്കുന്നതിനുമായി ഭാരമുള്ള വസ്തുക്കൾ തോളുകൾക്ക് മുകളിലേക്ക് ഉയർത്താതെ താഴെയായി സൂക്ഷിക്കണമെന്നും നിർദ്ദേശമുണ്ട്.
സുരക്ഷിതമായ ശാരീരിക രീതികൾ
ഭാരം ഉയർത്തുമ്പോൾ അരക്കെട്ട് കുനിക്കുന്നത് ഒഴിവാക്കണം. പകരം പാദങ്ങൾ തോളിന്റെ വീതിയിൽ അകത്തി വയ്ക്കുകയും നെഞ്ച് ഉയർത്തിപ്പിടിച്ച് ഉപ്പൂറ്റിയിൽ ഊന്നി ഭാരം ഉയർത്തുകയും വേണം. ഇത്തരം സന്ദർഭങ്ങളിൽ ഭാരം എപ്പോഴും ശരീരത്തോട് ചേർത്ത് പിടിക്കാൻ ശ്രദ്ധിക്കണം. “ജോലിസ്ഥലത്തെ സുരക്ഷ എല്ലാവരുടെയും ഉത്തരവാദിത്തമാണ്; സുരക്ഷിതമായ ജോലിസ്ഥലത്തിനും ആരോഗ്യകരമായ ഭാവിക്കുമായി നമുക്ക് ഒന്നിക്കാം” എന്ന് മന്ത്രാലയം പ്രസ്താവനയിൽ അറിയിച്ചു.
