കുവൈറ്റ് വിമാനത്താവളത്തിന് നേരെ ഇറാൻ ആക്രമണം; വ്യോമഗതാഗതം താൽക്കാലികമായി നിർത്തിവെച്ചു

കുവൈറ്റ് സിറ്റി: കുവൈറ്റ് അന്താരാഷ്ട്ര വിമാനത്താവളത്തിലെ ടെർമിനൽ ഒന്നിന് നേരെ ഇറാൻ ആക്രമണം ഉണ്ടായതിനെ തുടർന്ന് രാജ്യത്തെ വ്യോമഗതാഗതം താൽക്കാലികമായി നിർത്തിവെച്ചതായി കുവൈറ്റ് പബ്ലിക് അതോറിറ്റി ഫോർ സിവിലിയൻ ഏവിയേഷൻ (PACA) ബുധനാഴ്ച അറിയിച്ചു. കുവൈറ്റ് ന്യൂസ് ഏജൻസിയെ (KUNA) ഉദ്ധരിച്ചാണ് ഇക്കാര്യം റിപ്പോർട്ട് ചെയ്തിരിക്കുന്നത്.

അടിയന്തര പ്ലാൻ ആക്ടിവേറ്റ് ചെയ്തു

ഇറാനിയൻ മിസൈലുകളും ഡ്രോണുകളും പതിച്ച് ടെർമിനൽ ഒന്നിന് കേടുപാടുകൾ സംഭവിക്കുകയും ആളപായം ഉണ്ടാവുകയും ചെയ്തതിനെ തുടർന്ന് വിമാനത്താവളത്തിൽ അടിയന്തര പ്ലാൻ ആക്ടിവേറ്റ് ചെയ്തതായി PACA വ്യക്തമാക്കി. തൊഴിലാളികളുടെയും യാത്രക്കാരുടെയും സുരക്ഷ ഉറപ്പാക്കിക്കൊണ്ട് ഔദ്യോഗിക പ്രോട്ടോക്കോൾ അനുസരിച്ചാണ് അധികൃതർ നിലവിലെ സാഹചര്യം കൈകാര്യം ചെയ്യുന്നത്. വിമാനത്താവളത്തിലെ പ്രവർത്തനങ്ങൾ പുനരാരംഭിക്കുന്നതിനായി സാങ്കേതിക വിദഗ്ധർ കേടുപാടുകൾ വിലയിരുത്തി വരുന്നു.

വൻ നാശനഷ്ടം

ചൊവ്വാഴ്ച രാത്രി വൈകിയുണ്ടായ ഇറാൻ ആക്രമണത്തിൽ വിമാനത്താവള കെട്ടിടത്തിന് വലിയ തോതിൽ നാശനഷ്ടങ്ങൾ സംഭവിച്ചതായും നിരവധി പേർക്ക് പരിക്കേറ്റതായും പ്രതിരോധ മന്ത്രാലയ വക്താവ് നേരത്തെ അറിയിച്ചിരുന്നു.