വിമാനയാത്രകളിൽ ലിഥിയം ബാറ്ററികൾ അടങ്ങിയ പവർ ബാങ്കുകൾ കൈവശം വെക്കുന്നതുമായി ബന്ധപ്പെട്ട് ഖത്തർ സിവിൽ ഏവിയേഷൻ അതോറിറ്റി പരിഷ്കരിച്ച നിയന്ത്രണങ്ങൾ പ്രഖ്യാപിച്ചു.
ക്യാബിൻ ബാഗേജിൽ മാത്രം പ്രവേശനം; പരമാവധി രണ്ട് എണ്ണം
പുതിയ നിയമപ്രകാരം യാത്രക്കാർക്ക് പരമാവധി രണ്ട് പവർ ബാങ്കുകൾ മാത്രമേ കൈവശം വെക്കാൻ അനുവാദമുള്ളൂ. ഇതിൽ ഓരോന്നിന്റെയും ശേഷി 100 വാട്ട്-അവർ (Wh) കവിയരുത്. പവർ ബാങ്കുകൾ കൈലഗേജിൽ (Cabin Baggage) മാത്രമേ സൂക്ഷിക്കാവൂ എന്നും ചെക്ക്-ഇൻ ലഗേജുകളിൽ ഇവ കൊണ്ടുപോകുന്നത് കർശനമായി നിരോധിച്ചിട്ടുണ്ടെന്നും അതോറിറ്റി ഊന്നിപ്പറഞ്ഞു. വിമാനത്തിനുള്ളിൽ വെച്ച് പവർ ബാങ്കുകൾ ചാർജ് ചെയ്യുന്നതിനും അനുമതിയില്ല.
സുരക്ഷാ മുൻകരുതലുകൾ
കേടുപാടുകളോ ഷോർട്ട് സർക്യൂട്ടോ ഉണ്ടാകാത്ത രീതിയിൽ പവർ ബാങ്കുകളുടെ ചാർജിംഗ് ടെർമിനലുകൾ സുരക്ഷിതമായി സൂക്ഷിക്കാൻ യാത്രക്കാർ ശ്രദ്ധിക്കണം. അടിയന്തര സാഹചര്യങ്ങളിൽ കാബിൻ ക്രൂവിന് പെട്ടെന്ന് കൈകാര്യം ചെയ്യാൻ പാകത്തിൽ എളുപ്പത്തിൽ എടുക്കാൻ കഴിയുന്ന രീതിയിലായിരിക്കണം ഇവ വെക്കേണ്ടത്. മുകളിലെ ഓവർഹെഡ് കമ്പാർട്ടുമെന്റുകളിലോ സൈഡ് ലോക്കറുകളിലോ ഇവ സൂക്ഷിക്കാൻ പാടില്ല.
യാത്രയ്ക്ക് മുൻപായി അതത് എയർലൈനുകൾ ഏർപ്പെടുത്തിയിട്ടുള്ള മറ്റ് അധിക നിയന്ത്രണങ്ങൾ കൂടി യാത്രക്കാർ പരിശോധിച്ച് ഉറപ്പുവരുത്തേണ്ടതുണ്ട്. അപകടകരമായ വസ്തുക്കളുമായി ബന്ധപ്പെട്ട നിയന്ത്രണങ്ങളോ കാബിൻ ക്രൂവിന്റെ നിർദ്ദേശങ്ങളോ ലംഘിച്ചാൽ നിയമനടപടികൾ നേരിടേണ്ടി വരുമെന്നും അതോറിറ്റി മുന്നറിയിപ്പ് നൽകി.
ഇന്റർനാഷണൽ സിവിൽ ഏവിയേഷൻ ഓർഗനൈസേഷൻ (ICAO), ഇന്റർനാഷണൽ എയർ ട്രാൻസ്പോർട്ട് അസോസിയേഷൻ (IATA) എന്നിവയുടെ ഏറ്റവും പുതിയ മാർഗ്ഗനിർദ്ദേശങ്ങൾക്ക് അനുസൃതമായാണ് പുതിയ മാറ്റങ്ങൾ വരുത്തിയിട്ടുള്ളതെന്നും അധികൃതർ സോഷ്യൽ മീഡിയയിലൂടെ അറിയിച്ചു.
