ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽ താനി, ഇസ്ലാമിക് റിപ്പബ്ലിക് ഓഫ് ഇറാൻ വിദേശകാര്യ മന്ത്രി ഡോ. അബ്ബാസ് അരാഗ്ചിയുമായി ഫോണിൽ സംസാരിച്ചു. മേഖലയിലെ സുരക്ഷയും സ്ഥിരതയും വർദ്ധിപ്പിക്കുന്നതിന് വെടിനിർത്തൽ ഏകീകരിക്കേണ്ടതിന്റെ ആവശ്യകതയും ഇതുമായി ബന്ധപ്പെട്ട ഏറ്റവും പുതിയ സംഭവവികാസങ്ങളും ഇരുനേതാക്കളും ചർച്ച ചെയ്തു. സമാധാനപരമായ മാർഗങ്ങളിലൂടെയും ചർച്ചകളിലൂടെയും പ്രതിസന്ധിയുടെ വേരുകൾ കണ്ടെത്തി പരിഹരിക്കണമെന്നും സുസ്ഥിരമായ കരാറിലെത്തുന്നതിനും സംഘർഷം വീണ്ടും വർദ്ധിക്കുന്നത് തടയുന്നതിനും നിലവിലുള്ള മധ്യസ്ഥ ശ്രമങ്ങളോട് എല്ലാ കക്ഷികളും സഹകരിക്കണമെന്നും ഖത്തർ പ്രധാനമന്ത്രി ആഹ്വാനം ചെയ്തു.
സമുദ്രപാതകളുടെ സംരക്ഷണം ആഗോള സുരക്ഷയ്ക്ക് അനിവാര്യമെന്ന് ഖത്തർ
സമുദ്രപാതകൾ തുറന്നിടേണ്ടതിന്റെയും കപ്പൽ ഗതാഗത സ്വാതന്ത്ര്യം ഉറപ്പാക്കേണ്ടതിന്റെയും ആവശ്യകത ചർച്ചയിൽ ഷെയ്ഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽ താനി ഊന്നിപ്പറഞ്ഞു. സമുദ്രപാതകളെ സമ്മർദ്ദ തന്ത്രങ്ങൾക്കോ വിലപേശലുകൾക്കോ ഉള്ള മാർഗമായി ഉപയോഗിക്കരുതെന്ന് അദ്ദേഹം വ്യക്തമാക്കി. ഇത്തരം നടപടികൾ മേഖലയിലെ രാജ്യങ്ങളെയും ലോകത്തെ ഊർജ്ജ-ഭക്ഷ്യ വിതരണത്തെയും പ്രതികൂലമായി ബാധിക്കുമെന്നും ഇത് അന്താരാഷ്ട്ര സമാധാനത്തിനും സുരക്ഷയ്ക്കും വലിയ ഭീഷണിയാണെന്നും അദ്ദേഹം കൂട്ടിച്ചേർത്തു.
