ദോഹ: ലെബനന്റെ വിവിധ മേഖലകളിൽ ഇസ്രായേൽ നടത്തുന്ന ക്രൂരമായ വ്യോമാക്രമണങ്ങളെ ഖത്തർ ശക്തമായി അപലപിച്ചു. നൂറുകണക്കിന് ആളുകളുടെ മരണത്തിനും പരിക്കിനും ഇടയാക്കിയ ആക്രമണങ്ങൾ അങ്ങേയറ്റം ദൗർഭാഗ്യകരമാണെന്ന് ഖത്തർ വിദേശകാര്യ മന്ത്രാലയം പ്രസ്താവനയിൽ അറിയിച്ചു.
ബുധനാഴ്ച പുറത്തിറക്കിയ പ്രസ്താവനയിൽ, ഈ ആക്രമണങ്ങൾ വലിയ തോതിലുള്ള സംഘർഷ വ്യാപനമാണെന്നും ലെബനന്റെ പരമാധികാരത്തിന്മേലുള്ള കടന്നുകയറ്റമാണെന്നും മന്ത്രാലയം വ്യക്തമാക്കി. ഇത് അന്താരാഷ്ട്ര മാനുഷിക നിയമങ്ങളുടെയും ഐക്യരാഷ്ട്രസഭയുടെ സെക്യൂരിറ്റി കൗൺസിൽ പ്രമേയം 1701-ന്റെയും നഗ്നമായ ലംഘനമാണെന്ന് ഖത്തർ ചൂണ്ടിക്കാട്ടി.
ലെബനനിലെ ക്രൂരമായ കൂട്ടക്കൊലകളും ആവർത്തിച്ചുള്ള ആക്രമണങ്ങളും അവസാനിപ്പിക്കാൻ ഇസ്രായേൽ അധിനിവേശ അധികാരികളെ നിർബന്ധിക്കണമെന്നും അന്താരാഷ്ട്ര സമൂഹം ഉത്തരവാദിത്തം ഏറ്റെടുക്കണമെന്നും മന്ത്രാലയം ആവശ്യപ്പെട്ടു. ലെബനന്റെ സുരക്ഷയും സ്ഥിരതയും നിലനിർത്തുന്നതിനുള്ള എല്ലാ നടപടികൾക്കും ഖത്തർ പൂർണ്ണ പിന്തുണ പ്രഖ്യാപിച്ചു. ലെബനന്റെ ഐക്യത്തിനും പരമാധികാരത്തിനും ഒപ്പമായിരിക്കും ഖത്തറെന്നും പ്രസ്താവനയിൽ ഉറപ്പിച്ചു പറഞ്ഞു
