താമസമേഖലകളിലും സ്കൂൾ പരിസരങ്ങളിലും വേഗത കുറയ്ക്കണം; ഡ്രൈവർമാർക്ക് കർശന നിർദേശവുമായി ആഭ്യന്തര മന്ത്രാലയം
ദോഹ: പൊതുസുരക്ഷ മുൻനിർത്തി രാജ്യത്തെ താമസമേഖലകളിൽ വാഹനങ്ങളുടെ വേഗത കുറയ്ക്കണമെന്ന് ഖത്തർ ആഭ്യന്തര മന്ത്രാലയം വാഹനമോടിക്കുന്നവർക്ക് നിർദേശം നൽകി. റോഡ് സുരക്ഷ ഉറപ്പാക്കുന്നതിനും വാഹനാപകടങ്ങൾ കുറയ്ക്കുന്നതിനുമാണ് ഇത്തരം മുൻകരുതലുകൾ അനിവാര്യമാണെന്ന് മന്ത്രാലയം സോഷ്യൽ മീഡിയ പോസ്റ്റിലൂടെ വ്യക്തമാക്കി.
വിദ്യാഭ്യാസ സ്ഥാപനങ്ങൾക്ക് സമീപവും വാഹനങ്ങളുടെ വേഗത നിയന്ത്രിക്കണം. വിദ്യാർത്ഥികൾക്ക് സുരക്ഷിതമായ ഗതാഗത സാഹചര്യം ഒരുക്കുന്നതിന്റെ ഭാഗമായാണിത്. ഡ്രൈവിംഗിനിടെ മൊബൈൽ ഫോൺ ഉപയോഗിക്കുന്നത് ഉൾപ്പെടെയുള്ള ശ്രദ്ധ തിരിക്കുന്ന കാര്യങ്ങൾ ഒഴിവാക്കണമെന്ന് ആവശ്യപ്പെട്ട് മന്ത്രാലയം നേരത്തെ പൊതുജനങ്ങൾക്ക് എസ്എംഎസ് (SMS) സന്ദേശങ്ങൾ അയച്ചിരുന്നു.
സ്കൂൾ ബസുകളിൽ കയറുമ്പോഴും ഇറങ്ങുമ്പോഴും സുരക്ഷാ മാനദണ്ഡങ്ങൾ പാലിക്കണമെന്നും റോഡ് മുറിച്ചുകടക്കാൻ നിശ്ചിത പെഡസ്ട്രിയൻ ക്രോസിംഗുകൾ (Pedestrian Crossings) മാത്രം ഉപയോഗിക്കണമെന്നും മന്ത്രാലയം വിദ്യാർത്ഥികളോടും അഭ്യർത്ഥിച്ചു. നിയമങ്ങൾ പാലിക്കുന്നതിലൂടെ അപകടരഹിതമായ ഒരു റോഡ് സംസ്കാരം കെട്ടിപ്പടുക്കാൻ സാധിക്കുമെന്നും അധികൃതർ ഓർമ്മിപ്പിച്ചു
