ദോഹ: ഖത്തർ ജനറൽ അതോറിറ്റി ഓഫ് കസ്റ്റംസ് 102 വെള്ളി കട്ടകളുടെ ഇലക്ട്രോണിക് ലേലം പ്രഖ്യാപിച്ചു. 2026 മാർച്ച് 31 ചൊവ്വാഴ്ച മുതലാണ് ലേലം ആരംഭിക്കുന്നത്. നിക്ഷേപകർക്കും താല്പര്യമുള്ള പൊതുജനങ്ങൾക്കും കസ്റ്റംസിന്റെ ഔദ്യോഗിക പ്ലാറ്റ്ഫോമിലൂടെ ഇതിൽ പങ്കാളികളാകാം.
ഓരോ വെള്ളി കട്ടയ്ക്കും 999.9 ഗ്രാം തൂക്കമാണുള്ളത്. ലേലത്തിൽ ഒരു കട്ടയ്ക്ക് കുറഞ്ഞത് 7,000 ഖത്തർ റിയാലാണ് പ്രാരംഭ വിലയായി നിശ്ചയിച്ചിരിക്കുന്നത്.
പങ്കെടുക്കേണ്ട വിധം:
താല്പര്യമുള്ളവർക്ക് കസ്റ്റംസ് വകുപ്പിന്റെ ഔദ്യോഗിക ലേല പ്ലാറ്റ്ഫോമായ ‘Maza Al-Jomrok’ ആപ്ലിക്കേഷൻ വഴി ലേലത്തിൽ പങ്കെടുക്കാം. ഈ ആപ്പ് ആപ്പിൾ ആപ്പ് സ്റ്റോറിലും ഗൂഗിൾ പ്ലേ സ്റ്റോറിലും ലഭ്യമാണ്.
നിബന്ധനകൾ:
- പേയ്മെന്റ്: ലേലം വിജയിക്കുന്നവർ 24 മണിക്കൂറിനുള്ളിൽ മുഴുവൻ തുകയും അടയ്ക്കണം. പണമടയ്ക്കുന്നതിൽ വീഴ്ച വരുത്തിയാൽ ബിഡ് റദ്ദാക്കുകയും കെട്ടിവെച്ച തുക കണ്ടുകെട്ടുകയും ചെയ്യും. കൂടാതെ, ആ ഇനം മുൻകൂട്ടി അറിയിക്കാതെ തന്നെ വീണ്ടും ലേലം ചെയ്യും.
- പരിശോധന: ലേലത്തിന് മുൻപായി വെള്ളി കട്ടകൾ നേരിട്ട് കണ്ട് പരിശോധിക്കാൻ സൗകര്യമുണ്ട്. ഞായർ മുതൽ വ്യാഴം വരെ രാവിലെ 8 മണി മുതൽ 11 മണി വരെയാണ് പരിശോധനാ സമയം.
- ശേഖരണം: ലേലം വിജയിച്ച് ഏഴ് ദിവസത്തിനുള്ളിൽ സാധനങ്ങൾ കൈപ്പറ്റണം. ഞായർ മുതൽ വ്യാഴം വരെ രാവിലെ 7:30 മുതൽ 11:30 വരെ സാധനങ്ങൾ ശേഖരിക്കാവുന്നതാണ്.
കൂടുതൽ വിവരങ്ങൾ അറിയാൻ താല്പര്യമുള്ളവർക്ക് 60054548 എന്ന നമ്പറിൽ ബന്ധപ്പെടാവുന്നതാണെന്ന് കസ്റ്റംസ് അതോറിറ്റി അറിയിച്ചു.
