ദോഹയിലെ ലൂസൈൽ റോഡിലുള്ള പേൾ ഇന്റർചേഞ്ച് അണ്ടർപാസ്സിലെ ഇടത് വരിയിൽ (Left lane) താൽക്കാലിക ഗതാഗത നിയന്ത്രണം ഏർപ്പെടുത്തുന്നതായി പൊതുമരാമത്ത് അതോറിറ്റിയായ അശ്ഗാൽ അറിയിച്ചു. ദോഹ ഭാഗത്തേക്കുള്ള യാത്രക്കാർക്കാണ് ഈ നിയന്ത്രണം ബാധകമാകുക. ജനറൽ ഡയറക്ടറേറ്റ് ഓഫ് ട്രാഫിക്കുമായി സഹകരിച്ച് നടത്തുന്ന അനിവാര്യമായ അറ്റകുറ്റപ്പണികൾക്കായാണ് ഈ നടപടി.
നിയന്ത്രണം പ്രാബല്യത്തിൽ വരുന്നത് 2026 ഫെബ്രുവരി 7 ശനിയാഴ്ച പുലർച്ചെ 2 മണി മുതലാണ്. ഇത് ഫെബ്രുവരി 8 ഞായറാഴ്ച പുലർച്ചെ 2 മണി വരെ നീണ്ടുനിൽക്കും. ഈ സമയപരിധിയിൽ പേൾ ഭാഗത്ത് നിന്ന് ദോഹയിലേക്ക് പോകുന്ന വാഹനങ്ങൾ ടണലിന് സമീപമെത്തുമ്പോൾ വേഗത കുറയ്ക്കണമെന്നും നിലവിൽ തുറന്നിട്ടുള്ള മറ്റ് രണ്ട് വരികൾ ഉപയോഗിക്കണമെന്നും അധികൃതർ നിർദ്ദേശിച്ചു. സുരക്ഷിതമായ യാത്രയ്ക്കായി റോഡിൽ സ്ഥാപിച്ചിട്ടുള്ള ട്രാഫിക് ചിഹ്നങ്ങൾ കൃത്യമായി പാലിക്കണമെന്നും അശ്ഗാൽ അഭ്യർത്ഥിച്ചു.
