ദോഹ: ഖത്തറിൽ ശബാത്ത് (Shabat) സീസണിന്റെ രണ്ടാം ഘട്ടത്തിന് തുടക്കം കുറിച്ചുകൊണ്ട് ഇന്ന് (ജനുവരി 28) ആകാശത്ത് ‘അൽ ബൽദ’ (Al Baldah Star) നക്ഷത്രം ദൃശ്യമാകുമെന്ന് കാലാവസ്ഥാ വകുപ്പ് അറിയിച്ചു. ശൈത്യകാലത്തെ പ്രധാന ഘട്ടങ്ങളിലൊന്നായ ശബാത്തിന്റെ അവസാന പതിമൂന്ന് ദിവസങ്ങളാണ് ഇതിലൂടെ ആരംഭിക്കുന്നത്.
അൽ ബൽദ നക്ഷത്രത്തിന്റെ ഉദയത്തോടെ നിലവിലെ തണുത്ത കാലാവസ്ഥ തുടരുമെങ്കിലും, രണ്ടാഴ്ചയ്ക്കുള്ളിൽ തണുപ്പിന്റെ കാഠിന്യം കുറഞ്ഞുതുടങ്ങുമെന്ന് ഖത്തർ കാലാവസ്ഥാ വകുപ്പ് (QMD) വ്യക്തമാക്കി. കാറ്റ് ക്രമേണ തെക്ക് ദിശയിലേക്ക് മാറാനും ഇടയ്ക്കിടെ മഴമേഘങ്ങൾ പ്രത്യക്ഷപ്പെടാനും ഈ കാലയളവിൽ സാധ്യതയുണ്ട്.
അൽ നആം (Al Nae’aem), അൽ ബൽദ (Al Baldah) എന്നിങ്ങനെ 13 ദിവസം വീതം നീണ്ടുനിൽക്കുന്ന രണ്ട് ഘട്ടങ്ങളാണ് ശബാത്ത് സീസണിലുള്ളത്. ഇതിൽ രണ്ടാമത്തെയും അവസാനത്തെയും ഘട്ടമാണ് ഇന്ന് ആരംഭിച്ചിരിക്കുന്നത്. വരും ദിവസങ്ങളിൽ പ്രഭാതങ്ങളിൽ തണുപ്പ് അനുഭവപ്പെടുമെങ്കിലും പകൽ സമയങ്ങളിൽ കാലാവസ്ഥ കൂടുതൽ തെളിയാൻ സാധ്യതയുണ്ടെന്നും റിപ്പോർട്ടുകൾ സൂചിപ്പിക്കുന്നു.
