ഖത്തറിലെ ആയിരത്തിലധികം കമ്പനികളിലേക്കായി 270 ബില്യൺ റിയാൽ നിക്ഷേപമെത്തിയെന്ന് വാണിജ്യ വ്യവസായ മന്ത്രാലയം

നാഷണൽ പ്രോഡക്റ്റ് വീക്ക്, 1,000 ഓപ്പർച്യൂണിറ്റിസ് ഇനിഷ്യേറ്റിവ്, റമദാൻ, ഈദ് കാലത്തെ പ്രത്യേക പരിപാടികൾ തുടങ്ങിയ ദേശീയ സംരംഭങ്ങളെ പിന്തുണച്ച കമ്പനികളെയും സംഘടനകളെയും ആദരിക്കുന്നതിനായി ഖത്തർ വാണിജ്യ വ്യവസായ മന്ത്രാലയം അടുത്തിടെ ഒരു ചടങ്ങ് സംഘടിപ്പിച്ചു.

ഖത്തറിന്റെ വ്യാവസായിക മേഖല വേഗത്തിൽ വളരുകയാണെന്ന് വ്യവസായ, ബിസിനസ് വികസന അസിസ്റ്റന്റ് അണ്ടർസെക്രട്ടറി സാലിഹ് മജീദ് അൽ ഖുലൈഫി പറഞ്ഞു. കഴിഞ്ഞ വർഷം അവസാനത്തോടെ, രാജ്യത്ത് 270 ബില്യൺ ഖത്തർ റിയാൽ നിക്ഷേപവുമായി 1,004 ഫാക്റ്ററികളാണ് പ്രവർത്തിച്ചത്. സ്വകാര്യ മേഖലയെ ശക്തിപ്പെടുത്താനും സാമ്പത്തിക വളർച്ചയ്ക്കും വൈവിധ്യവൽക്കരണത്തിനും പിന്തുണ നൽകാനുമാണ് ഈ സംരംഭങ്ങൾ ലക്ഷ്യമിടുന്നതെന്ന് അദ്ദേഹം പറഞ്ഞു.

2022-ൽ ഖത്തർ വികസന ബാങ്കുമായി ചേർന്ന് ഒരു പ്രധാന സംരംഭമായ 1,000 ഓപ്പർച്യൂണിറ്റിസ് പ്രോഗ്രാം ആരംഭിച്ചു. സിംഗിൾ വിൻഡോ ഡിജിറ്റൽ പ്ലാറ്റ്‌ഫോമിലൂടെ പുതിയതും ഭാവിയിലുള്ളതുമായ അവസരങ്ങൾ കണ്ടെത്താൻ ഇത് പ്രാദേശിക നിക്ഷേപകരെ സഹായിക്കുന്നു. 2030-ഓടെ ഉൽപ്പാദനം 70.5 ബില്യൺ റിയാലായി ഉയർത്തുക, എണ്ണ ഇതര കയറ്റുമതി 49 ബില്യൺ റിയാലായി ഉയർത്തുക, വ്യാവസായിക നിക്ഷേപം 326 ബില്യൺ റിയാലായി വളർത്തുക എന്നിവ ലക്ഷ്യമിടുന്ന 2024–2030-ലെ മാനുഫാക്ച്ചറിങ് സ്ട്രാറ്റജിയെക്കുറിച്ചും അൽ ഖുലൈഫി സംസാരിച്ചു.

റമദാൻ ഡിസ്‌കൗണ്ട് കൺസ്യൂമർ ഗുഡ്‌സ് പ്രോഗ്രാമിന്റെ വിജയത്തെ ഉപഭോക്തൃ കാര്യ അസിസ്റ്റന്റ് അണ്ടർസെക്രട്ടറി ഹസ്സൻ സുൽത്താൻ അൽ ഗാനേം പ്രശംസിച്ചു. ഈ സംരംഭം റമദാനിൽ വില 10% കുറയ്ക്കാൻ സഹായിച്ചു, ഇതിന്റെ ഭാഗമായി 5 മില്യൺ റിയാലിലധികമാണ് ഉപഭോക്താക്കൾ ലാഭിച്ചത്. ഏകദേശം 18 സ്റ്റോറുകൾ പരിപാടിയിൽ പങ്കെടുത്തു. ഈ സംരംഭം ആരംഭിച്ചതിനുശേഷം ഏറ്റവും ഉയർന്ന വിൽപ്പന ഈ വർഷമാണ് നടന്നത്. സാമ്പത്തിക സമ്മർദ്ദം ലഘൂകരിക്കാനും പൊതു-സ്വകാര്യ മേഖലകൾ തമ്മിലുള്ള സഹകരണത്തിന്റെ ശക്തി കാണിക്കാനും ഇത്തരം പരിപാടികൾ സഹായിക്കുമെന്ന് അദ്ദേഹം പറഞ്ഞു.

നാഷണൽ പ്രോഡക്റ്റ് വീക്കിൽ ശക്തമായ പൊതുജന താൽപ്പര്യം പ്രകടമായിരുന്നു, ചില സ്റ്റോറുകളിലെ വിൽപ്പനയിൽ 75% വർധനവ് ഉണ്ടായി. ഖത്തരി പ്രോഡക്റ്റ് ലേബലിനായി ഫാക്ടറികൾക്ക് അപേക്ഷിക്കാനും വ്യാപാര പ്രശ്നങ്ങൾ റിപ്പോർട്ട് ചെയ്യാനും കഴിയുന്ന ഒരു പുതിയ വെബ്‌പേജും അദ്ദേഹം പ്രഖ്യാപിച്ചു. ഖത്തർ നാഷണൽ വിഷൻ 2030 പ്രകാരം ഖത്തറിന്റെ വ്യാവസായിക നയങ്ങളുടെ വിജയം കാണിക്കുന്ന ദേശീയ ഉൽപ്പന്നങ്ങളുടെ എണ്ണം 1,815 ആയി വർദ്ധിച്ചുവെന്ന് അദ്ദേഹം ചൂണ്ടിക്കാട്ടി.

മന്ത്രാലയത്തിന്റെ പ്രധാന സംരംഭങ്ങളെക്കുറിച്ചുള്ള ഒരു വീഡിയോ അവതരണവും പരിപാടിയിൽ ഉണ്ടായിരുന്നു, സാമ്പത്തിക വികസനത്തിനുള്ള സംഭാവനകളെ അംഗീകരിക്കുന്നതിനുള്ള ഒരു അവാർഡ് ദാന ചടങ്ങോടെയാണ് പരിപാടി അവസാനിച്ചത്.

ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ് 👇https://chat.whatsapp.com/EXau0c7bVzpANryExd3Apv