വിവിധ ജിസിസി രാജ്യങ്ങളിൽ നടക്കുന്ന ട്രാഫിക് നിയമലംഘനങ്ങൾ തമ്മിൽ ബന്ധിപ്പിക്കുന്നതിനെ കുറിച്ച് ഗൾഫ് അധികൃതർ പഠനം നടത്തുന്നു. സംവിധാനം നടപ്പാക്കിക്കഴിഞ്ഞാൽ, ഖത്തർ രജിസ്റ്റർ ഉള്ള വാഹനങ്ങൾ മറ്റ് ഗൾഫ് രാജ്യങ്ങളിൽ നടത്തുന്ന ട്രാഫിക് നിയമലംഘനങ്ങൾ, ഖത്തർ നിയമലംഘനങ്ങളായി കണക്കാക്കുകയും ആഭ്യന്തര മന്ത്രാലയത്തിന്റെ മെട്രാഷ്2 വഴിയോ ഇലക്ട്രോണിക് സേവനങ്ങൾ വഴിയോ പിഴ അടയ്ക്കുകയും ചെയ്യാം.
ജിസിസി രാജ്യങ്ങൾ തമ്മിലുള്ള ഗതാഗത ലംഘനങ്ങൾ ബന്ധിപ്പിക്കുന്നതിനുള്ള വർക്കിംഗ് ഗ്രൂപ്പിന്റെ പത്താം യോഗത്തിൽ ട്രാഫിക് ഡിപ്പാർട്ട്മെന്റ് കഴിഞ്ഞയാഴ്ച പങ്കെടുത്തിരുന്നതായി ജനറൽ ഡയറക്ടറേറ്റ് ഓഫ് ട്രാഫിക്കിലെ മീഡിയ ആന്റ് ട്രാഫിക് അവേർനെസ് ഡിപ്പാർട്ട്മെന്റ് അസിസ്റ്റന്റ് ഡയറക്ടർ കേണൽ ജാബർ മുഹമ്മദ് റാഷിദ് ഒദൈബ അറിയിച്ചു.
പദ്ധതി എപ്പോൾ തയ്യാറാകുമെന്ന ചോദ്യത്തിന്, മീറ്റിംഗുകൾ നടക്കുന്നുണ്ടെന്നും ഇപ്പോൾ പൂർത്തീകരണ തീയതി നൽകാൻ കഴിയില്ലെന്നും കേണൽ ജാബർ മുഹമ്മദ് റാഷിദ് ഒദൈബ പറഞ്ഞു. ഇത് സൗദി അറേബ്യയും ഖത്തറും മാത്രമല്ല, എല്ലാ ജിസിസി രാജ്യങ്ങളും തമ്മിലാണെന്നും അദ്ദേഹം പറഞ്ഞു.
ഗൾഫ് രാജ്യങ്ങൾ തമ്മിലുള്ള ഗതാഗത ലംഘനങ്ങളെക്കുറിച്ച് വിവരങ്ങൾ കൈമാറുന്നുണ്ടെന്ന് ജനറൽ ഡയറക്ടറേറ്റ് ഓഫ് ട്രാഫിക് ലംഘന ഓഫീസർ ഫസ്റ്റ് ലഫ്റ്റനന്റ് മുഹമ്മദ് റാബിയ അൽ കുവാരി അൽ റയാൻ ടിവിയോട് പറഞ്ഞു.
“സൗദി അറേബ്യയിൽ ഒരു ഖത്തർ വാഹനം ചില ഗതാഗത ലംഘനം നടത്തിയെന്ന് നമുക്ക് അനുമാനിക്കാം. ഒരാഴ്ചയ്ക്കുള്ളിൽ നിയമലംഘകന് ഒരു അറിയിപ്പ് വരും, ആ വ്യക്തിക്ക് വേണമെങ്കിൽ ദോഹയിലോ സൗദി അറേബ്യയിലോ പിഴ അടയ്ക്കാം, ”അദ്ദേഹം വിശദീകരിച്ചു.
“ഒരു വ്യക്തിക്ക് മെട്രാഷ് 2 വഴിയോ ആഭ്യന്തര മന്ത്രാലയം നൽകുന്ന ഇലക്ട്രോണിക് സേവനങ്ങൾ വഴിയോ ലംഘനത്തിന്റെ വിശദാംശങ്ങളെക്കുറിച്ച് അന്വേഷിക്കാം,” അദ്ദേഹം കൂട്ടിച്ചേർത്തു.
