ഖത്തറിലുള്ളവർക്ക് മികച്ചൊരു വീക്കെൻഡ് ഡെസ്റ്റിനേഷൻ, നിരവധി പ്രവർത്തനങ്ങളുമായി MIA ബസാർ വീണ്ടുമെത്തുന്നു
മ്യൂസിയം ഓഫ് ഇസ്ലാമിക് ആർട്ട് (MIA) ബസാർ ആവേശകരമായ പ്രവർത്തനങ്ങളുമായി തിരിച്ചെത്തുന്നു. MIA പാർക്കിൻ്റെ സോൺ 2-ലാണ് ബസാർ സജ്ജീകരിച്ചിരിക്കുന്നത്. ദോഹ വെസ്റ്റ് ബേയുടെ മനോഹരമായ കാഴ്‌ചകൾ ഇവിടം വാഗ്‌ദാനം ചെയ്യുന്നു, പശ്ചാത്തലത്തിൽ പ്രശസ്‌തമായ സ്കൈലൈനുമുണ്ട്. ഷോപ്പിംഗിനും വിശ്രമത്തിനും പറ്റിയ സ്ഥലമാണിത്.
ഈ മാർക്കറ്റിൽ കൈകൊണ്ട് നിർമ്മിച്ച കരകൗശലവസ്‌തുക്കൾ, കലാസൃഷ്ടികൾ, ഫാഷൻ എന്നിവയുൾപ്പെടെ പ്രാദേശിക സംരംഭകരിൽ നിന്നുള്ള വൈവിധ്യമാർന്ന നിരവധി ഇനങ്ങൾ പ്രദർശിപ്പിക്കുന്നു. പാർക്കിൻ്റെ മനോഹരമായ വാട്ടർഫ്രണ്ടും പ്രകൃതിദൃശ്യങ്ങളും രുചികരമായ ട്രീറ്റുകളും സന്ദർശകർക്ക് ഒരുമിച്ച് ആസ്വദിക്കാം.
എല്ലാ വെള്ളിയാഴ്ച്ചയും വൈകുന്നേരം 4 മുതൽ രാത്രി 10 വരെയും എല്ലാ ശനിയാഴ്ച്ചയും ഉച്ചയ്ക്ക് 2 മുതൽ രാത്രി 9 വരെയും സ്റ്റാളുകൾ തുറന്നിരിക്കും. ഇത് താമസക്കാർക്കും വിനോദസഞ്ചാരികൾക്കും വീക്കെൻഡ് ഡെസ്റ്റിനേഷൻ കൂടിയാണ്.
ബസാറിൽ ചേരാൻ ആഗ്രഹിക്കുന്ന സംരംഭകർക്ക് എങ്ങനെ പങ്കെടുക്കാം എന്നതിനെക്കുറിച്ചുള്ള കൂടുതൽ വിവരങ്ങൾ ലഭിക്കാൻ BDRFP@qm.org.qa എന്ന ഇമെയിലിൽ ബന്ധപ്പെടാവുന്നതാണ്.
