വിപണിയിൽ തെറ്റായ ധാരണ പരത്തുന്ന രീതിയിൽ ഓഹരി ഇടപാടുകൾ നടത്തിയ വ്യാപാരിക്കെതിരെ ഖത്തർ ഫിനാൻഷ്യൽ മാർക്കറ്റ്സ് അതോറിറ്റി (QFMA) ഏർപ്പെടുത്തിയ പിഴ ശിക്ഷ കോർട്ട് ഓഫ് കസേഷൻ ശരിവെച്ചു. ഖത്തർ ഫിനാൻഷ്യൽ മാർക്കറ്റ്സ് അതോറിറ്റിയിലെ അപ്പീൽ കമ്മിറ്റിയുടെ തീരുമാനം നേരത്തെ അപ്പീൽ കോടതിയും ശരിവെച്ചിരുന്നു. ഇതിനെതിരെയുള്ള ഹർജി തള്ളിക്കൊണ്ടാണ് ഇപ്പോൾ അന്തിമ ഉത്തരവ് വന്നിരിക്കുന്നത്.
ശിക്ഷാ നടപടിക്ക് കാരണമായ സാഹചര്യം
വലിയ തോതിലുള്ള പർച്ചേസ് ഓർഡറുകൾ നൽകുകയും തുടർന്ന് അവ റദ്ദാക്കുകയും ചെയ്തതിലൂടെ വിപണിയിൽ തെറ്റായ പ്രവണതകൾക്ക് വ്യാപാരി ശ്രമിച്ചതായി അതോറിറ്റി കണ്ടെത്തിയിരുന്നു. വിപണിയെ തെറ്റിദ്ധരിപ്പിക്കുക എന്ന ലക്ഷ്യത്തോടെയാണ് ഇയാൾ ഇത് ചെയ്തതെന്ന് വ്യക്തമായ സാഹചര്യത്തിലാണ് 150,000 ഖത്തർ റിയാൽ പിഴയും ശാസനയും നൽകാൻ അതോറിറ്റി തീരുമാനിച്ചത്. ഈ തീരുമാനമാണ് ഇപ്പോൾ ഉയർന്ന കോടതികളും അംഗീകരിച്ചിരിക്കുന്നത്.
