ലോകത്തിലെ ഏറ്റവും വലിയ എയർകണ്ടീഷൻഡ് ജോഗിങ് ട്രാക്ക്, റൗദത്ത് അൽ ഹമാമ പബ്ലിക് പാർക്ക് ഉദ്ഘാടനം ചെയ്തു
റൗദത്ത് അൽ ഹമാമ പബ്ലിക് പാർക്ക് മുനിസിപ്പാലിറ്റി മന്ത്രിയായ അബ്ദുല്ല ബിൻ ഹമദ് ബിൻ അബ്ദുല്ല അൽ അത്തിയ വ്യാഴാഴ്ച്ച ഔദ്യോഗികമായി ഉദ്ഘാടനം ചെയ്തു. 1,197 മീറ്റർ നീളമുള്ള ലോകത്തിലെ ഏറ്റവും ദൈർഘ്യമേറിയ എയർകണ്ടീഷൻഡ് ഔട്ട്ഡോർ വാക്കിംഗ്, ജോഗിംഗ് ട്രാക്ക് ഈ പാർക്കിലുണ്ട്. ചൂടുള്ള കാലാവസ്ഥയിലും ജോഗിങ്ങും വാക്കിങ്ങും സുഗമമായി നടത്താൻ ഇത് സഹായിക്കുന്നു.
പാർക്കിന് പ്രതിദിനം 10,000 സന്ദർശകരെ സ്വീകരിക്കാനാവും. ഖത്തറിലെ ഏറ്റവും വലിയ പ്ലാൻ്റ് ക്ലോക്ക്, 8 സർവീസ് കിയോസ്ക്കുകൾ, 500 കാണികൾക്ക് ഇരിക്കാവുന്ന തുറന്ന ആംഫി തിയേറ്റർ, പുരുഷന്മാർക്കും സ്ത്രീകൾക്കും പ്രത്യേകം പ്രാർത്ഥനാ മുറികളും കുളിമുറിയും തുടങ്ങി നിരവധി സവിശേഷ സവിശേഷതകൾ ഇതിൽ ഉൾപ്പെടുന്നു.
ഖത്തറിലെ പൊതു പാർക്കുകളുടെ എണ്ണം 2010-ൽ 56 ആയിരുന്നത് 2024-ൽ 147 ആയി ഉയർന്നു. 163% വളർച്ചയാണ് ഇക്കാര്യത്തിൽ ഉണ്ടായിരിക്കുന്നത്. ഹരിത ഇടങ്ങൾ 2010-ൽ 2.6 ദശലക്ഷം ചതുരശ്ര മീറ്ററിൽ നിന്ന് 2024-ൽ 18 ദശലക്ഷം ചതുരശ്ര മീറ്ററായി വികസിച്ചു.
കോർണിഷിനോട് ചേർന്നുള്ള പൊതു പാർക്കുകൾ, പ്ലാസകൾ, ഗ്രീൻ സ്പേസുകൾ എന്നിവ ഇപ്പോൾ 3 ദശലക്ഷം ചതുരശ്ര മീറ്ററിലധികം വ്യാപിച്ചുകിടക്കുന്നുണ്ടെന്നും അദ്ദേഹം സൂചിപ്പിച്ചു. ‘ടെൻ മില്യൺ ട്രീസ് ഇനിഷ്യേറ്റീവ്’ വഴി രാജ്യത്തുടനീളം 840,000 മരങ്ങളും കുറ്റിച്ചെടികളും നട്ടുപിടിപ്പിച്ചു, ഏകദേശം 500,000 ചതുരശ്ര മീറ്റർ ഹരിത ഇടങ്ങൾ സൃഷ്ടിച്ചു.
പാർക്കിൻ്റെ ആകെ വിസ്തീർണ്ണം 176,000 ചതുരശ്ര മീറ്ററാണ്, 138,000 ചതുരശ്ര മീറ്റർ ഹരിത ഇടങ്ങൾക്കായി നീക്കിവച്ചിരിക്കുന്നു, ഇത് പാർക്കിൻ്റെ 80% വരും. പ്രാദേശികവും അന്തർദേശീയവുമായ 21 ഇനങ്ങളിൽ നിന്നുള്ള 1,042 മരങ്ങൾ പാർക്കിലുണ്ട്. 100% ശുദ്ധീകരിച്ച വെള്ളം ഉപയോഗിക്കുന്ന ആധുനിക ജലസേചന സംവിധാനവും പാർക്കിൻ്റെ സവിശേഷതയാണ്.
ഖത്തറിൻ്റെ വിനോദ സൗകര്യങ്ങൾ മെച്ചപ്പെടുത്തുന്നതിനും സുസ്ഥിരത പ്രോത്സാഹിപ്പിക്കുന്നതിനുമുള്ള സുപ്രധാന ചുവടുവയ്പ്പാണ് ഈ പുതിയ പാർക്ക്.
