ദോഹ: ഖത്തറിന്റെ പ്രമുഖ സാംസ്കാരിക–പാചക മേളകളിലൊന്നായ ഖത്തർ ഇന്റർനാഷണൽ ഫുഡ് ഫെസ്റ്റിവൽ (QIFF) 2026 ജനുവരി 14 മുതൽ 24 വരെ 974 സ്റ്റേഡിയം പരിസരത്ത് നടക്കുമെന്ന് വിസിറ്റ് ഖത്തർ അറിയിച്ചു. 15-ാം പതിപ്പിലേക്കെത്തുന്ന ഫെസ്റ്റിവൽ, രാജ്യത്തിനകത്തുനിന്നും വിദേശത്തുനിന്നുമുള്ള ആയിരക്കണക്കിന് സന്ദർശകരെ ഒരിക്കൽ കൂടി ആകർഷിക്കുമെന്ന് അധികൃതർ വ്യക്തമാക്കി.
വിപുലമായ പാചക–സാംസ്കാരിക പരിപാടികൾ
QIFF 2026-ൽ പ്രാദേശികവും അന്താരാഷ്ട്രവുമായ റെസ്റ്റോറന്റുകളുടെ വലിയ നിര, പ്രശസ്ത ഷെഫ്മാർ നയിക്കുന്ന ലൈവ് കുക്കിംഗ് ഷോകൾ, കുടുംബസൗഹൃദ പരിപാടികൾ, പ്രത്യേക സാംസ്കാരിക സോണുകൾ, ദിവസേന വിനോദപരിപാടികൾ എന്നിവ ഉൾപ്പെടും. ഖത്തറിനെ ആഗോളതലത്തിലെ ഒരു പ്രധാന പാചക കേന്ദ്രമായി ഉയർത്തിക്കാട്ടുന്നതിന് ഊന്നൽ നൽകുന്നതാണ് ഈ പതിപ്പിന്റെ മുഖ്യ ലക്ഷ്യം.
ദിവസവും ഫയർവർക്സ്, ഡിന്നർ ഇൻ ദ സ്കൈ
ഫെസ്റ്റിവൽ വേദിയിൽ ദിനംപ്രതി നടക്കുന്ന ഫയർവർക്ക്സ് ഷോകൾ, ‘ഡിന്നർ ഇൻ ദ സ്കൈ’യുടെ തിരിച്ചുവരവ്, ഏറെ ജനപ്രിയമായ മാർക്കറ്റ് അനുഭവം എന്നിവ പ്രധാന ആകർഷണങ്ങളായിരിക്കും. ഡ്രോൺ ഷോകൾ, കുക്കിംഗ് സ്റ്റുഡിയോയിലെ ഇന്ററാക്ടീവ് സെഷനുകൾ, പുതിയ റെസ്റ്റോറന്റുകളുടെ പ്രദർശനങ്ങൾ, മത്സരങ്ങളും ‘പാഡൽ ഓഫ് മൈൻഡ്സ്’ ഗെയിമും ഉൾക്കൊള്ളുന്ന QIFF റിംഗ് തുടങ്ങിയവയും സന്ദർശകർക്കായി ഒരുക്കും.
സമയക്രമം
ഫെസ്റ്റിവൽ പ്രവർത്തന സമയം
– സാധാരണ ദിവസങ്ങളിൽ വൈകിട്ട് 4 മുതൽ രാത്രി 11 വരെ
– വാരാന്ത്യങ്ങളിൽ ഉച്ചകഴിഞ്ഞ് 3 മുതൽ പുലർച്ചെ 1 വരെ
ഫെസ്റ്റിവലിലെ വിശദമായ പരിപാടികൾ, പങ്കെടുക്കുന്ന ഷെഫ്മാർ, വിനോദ പരിപാടികളുടെ ഷെഡ്യൂൾ എന്നിവ പിന്നീട് പ്രഖ്യാപിക്കുമെന്ന് വിസിറ്റ് ഖത്തർ അറിയിച്ചു.
