തെരുവ് നായ്ക്കളെ കണ്ടുമുട്ടിയാൽ എന്തുചെയ്യണം? സുരക്ഷാ നിർദ്ദേശങ്ങളുമായി ആഭ്യന്തര മന്ത്രാലയം

ദോഹ: പൊതുസ്ഥലങ്ങളിൽ അലഞ്ഞുതിരിയുന്ന നായ്ക്കളെ കണ്ടുമുട്ടുമ്പോൾ പാലിക്കേണ്ട സുരക്ഷാ മുൻകരുതലുകളെക്കുറിച്ച് പൊതുജനങ്ങൾക്ക് നിർദ്ദേശം നൽകി ആഭ്യന്തര മന്ത്രാലയം (MoI). സോഷ്യൽ മീഡിയയിലൂടെ പങ്കുവെച്ച ഇൻഫോഗ്രാഫിക്സുകളിലൂടെയാണ് നായ്ക്കളുടെ പെരുമാറ്റരീതികളെക്കുറിച്ചും സ്വീകരിക്കേണ്ട സുരക്ഷാ നടപടികളെക്കുറിച്ചും മന്ത്രാലയം വിശദീകരിച്ചത്.

സാധാരണഗതിയിൽ അലഞ്ഞുതിരിയുന്ന നായ്ക്കൾ ഭക്ഷണത്തിനായോ കൗതുകം കൊണ്ടോ ആണ് മനുഷ്യരെ സമീപിക്കുന്നത്. ഭയമോ ഭീഷണിയോ തോന്നാത്ത പക്ഷം അവ മനുഷ്യരെ ആക്രമിക്കാറില്ല. എന്നാൽ തങ്ങളുടെ പ്രദേശം സംരക്ഷിക്കാനോ കുഞ്ഞുങ്ങളെ രക്ഷിക്കാനോ ഉള്ള സഹജമായ പ്രേരണയാൽ അവ ചിലപ്പോൾ അക്രമാസക്തമായി പെരുമാറിയേക്കാം.

ശ്രദ്ധിക്കേണ്ട പ്രധാന നിർദ്ദേശങ്ങൾ

• നിശ്ചലമായി നിൽക്കുക: നായ്ക്കളെ അഭിമുഖീകരിക്കുമ്പോൾ പെട്ടെന്ന് പരിഭ്രമിച്ച് ഓടുകയോ ബഹളം വെക്കുകയോ ചെയ്യരുത്. ഉടൻ തന്നെ ഒരിടത്ത് നിശ്ചലമായി നിൽക്കുക.
• ഓടുന്നത് ഒഴിവാക്കുക: നായ്ക്കളുടെ മുന്നിൽ നിന്ന് ഓടുന്നത് അവയുടെ വേട്ടയാടാനുള്ള സഹജവാസനയെ (Chase instinct) ഉണർത്തും.
• തടസ്സങ്ങൾ ഉപയോഗിക്കുക: നിങ്ങളുടെയും നായയുടെയും ഇടയിൽ ഒരു തടസ്സം സൃഷ്ടിക്കാൻ ശ്രമിക്കുക. കയ്യിലുള്ള ബാഗ് മുന്നിൽ പിടിക്കുകയോ അല്ലെങ്കിൽ ഒരു വാഹനത്തിന്റേയോ മരത്തിന്റേയോ പിന്നിലേക്ക് മാറുന്നതോ ഗുണകരമാണ്.
• കണ്ണുകളിൽ നോക്കരുത്: നായയുടെ കണ്ണുകളിലേക്ക് നേരിട്ട് നോക്കുന്നത് ഒഴിവാക്കുക. ഇത് അവയെ വെല്ലുവിളിക്കുന്നതായാണ് നായ്ക്കൾ കണക്കാക്കുന്നത്.
• പതുക്കെ പിൻവാങ്ങുക: നായയെ പ്രകോപിപ്പിക്കാതെ പതുക്കെ പിന്നോട്ട് നടന്ന് ആ പ്രദേശത്ത് നിന്ന് സുരക്ഷിതമായി പുറത്തുകടക്കുക.

ആക്രമണം ഉണ്ടായാൽ എന്തുചെയ്യണം?

ഒരു നായ ആക്രമിക്കാൻ മുതിർന്നാൽ, നായയ്ക്ക് പുറംതിരിഞ്ഞ് നിൽക്കാതെ ലഭ്യമായ മാർഗങ്ങൾ ഉപയോഗിച്ച് സ്വയം പ്രതിരോധിക്കാൻ ശ്രമിക്കണം. നായയുടെ കടിയേറ്റാൽ മുറിവ് ചെറുതാണെങ്കിൽ പോലും അവഗണിക്കരുത്. ഉടൻ തന്നെ അടുത്തുള്ള ആരോഗ്യ കേന്ദ്രത്തിലോ ആശുപത്രിയിലോ എത്തി പേവിഷബാധക്കെതിരെയുള്ള (Rabies) വാക്സിൻ സ്വീകരിക്കേണ്ടതാണ്. “ദ്രുതഗതിയിലുള്ള പ്രതികരണം നിങ്ങളുടെ ജീവൻ രക്ഷിക്കുമെന്ന് ഓർക്കുക,” മന്ത്രാലയം ഊന്നിപ്പറഞ്ഞു.

മുൻകരുതലുകൾ

• നായ്ക്കൾ കൂട്ടമായി കാണപ്പെടുന്ന സ്ഥലങ്ങളിലൂടെയുള്ള യാത്രകൾ ഒഴിവാക്കുക, പ്രത്യേകിച്ച് രാത്രികാലങ്ങളിൽ.
• ഒരേ സ്ഥലത്ത് വെച്ച് സ്ഥിരമായി അലഞ്ഞുതിരിയുന്ന നായ്ക്കൾക്ക് ഭക്ഷണം നൽകരുത്. ഇത് ആ സ്ഥലം തങ്ങളുടെ പ്രദേശമാണെന്ന് നായ്ക്കൾ കരുതിത്തുടങ്ങാൻ കാരണമാകും.
• നായക്കുട്ടികളെ സംരക്ഷിച്ചിരിക്കുന്ന സ്ഥലങ്ങളിൽ നിന്ന് വിട്ടുനിൽക്കുക.

എവിടെ റിപ്പോർട്ട് ചെയ്യണം?

അലഞ്ഞുതിരിയുന്ന നായ്ക്കളെക്കുറിച്ച് വിവരം നൽകാൻ ക്രിമിനൽ എവിഡൻസ് ആൻഡ് ഇൻഫർമേഷൻ ഡിപ്പാർട്ട്‌മെന്റിന് കീഴിലുള്ള പോലീസ് കനൈൻ വിഭാഗവുമായി (Police Canine Section) ബന്ധപ്പെടാം. ഫോൺ: 2346555.