3 മുതൽ 6 വയസ്സ് വരെ പ്രായമുള്ള ഭിന്നശേഷിയുള്ള കുട്ടികൾക്കായി “അൽ ജിവാൻ കിന്റർഗാർട്ടൻ ഫോർ ഏർലി ഇന്റർവെൻഷൻ” പ്രവർത്തനം ആരംഭിച്ചു. വിദ്യാഭ്യാസ, ഉന്നത വിദ്യാഭ്യാസ മന്ത്രാലയത്തിന്റെയും ഹമദ് മെഡിക്കൽ കോർപ്പറേഷന്റെയും സഹകരണത്തോടെയുള്ള ഈ സംരംഭം, ശാരീരിക, മാനസിക വെല്ലുവിളികളുള്ള കുട്ടികൾക്ക് സ്കൂളിലേക്കുള്ള സുഗമമായ മാറ്റം ഉറപ്പാക്കുന്നതിന് ആവശ്യമായ മുന്നൊരുക്കങ്ങൾ നൽകുന്നു.
ഏർലി ഇന്റർവെൻഷൻ പ്രോഗ്രാമിൽ ചേരാൻ അർഹതയുള്ള കുട്ടികളുടെ വിശദാംശങ്ങളും അവരെ എങ്ങനെ ചേർക്കാം എന്നതിനെക്കുറിച്ചും ഹമദ് മെഡിക്കൽ കോർപ്പറേഷൻ ഒരു സോഷ്യൽ മീഡിയ പോസ്റ്റിൽ വ്യക്തമാക്കി.
3 മുതൽ 6 വയസ്സ് വരെ പ്രായമുള്ള ഭിന്നശേഷിയുള്ള കുട്ടികൾക്ക് വളരാനും സമൂഹത്തിൽ സംവദിക്കാനും സഹായിക്കുന്നതിന് അൽ ജിവാൻ കിന്റർഗാർട്ടൻ ഫോർ ഏർലി ഇന്റർവെൻഷൻ ഒരു പ്രതീക്ഷയുടെ ജാലകമാണെന്ന് എച്ച്എംസി പറഞ്ഞു.
ചേരാവുന്ന വിദ്യാർത്ഥികൾ:
– കേൾവിക്കുറവുള്ള ബുദ്ധിപരമായ വെല്ലുവിളികൾ നേരിടുന്ന കുട്ടികൾ
– ശാരീരിക വൈകല്യമുള്ള കുട്ടികൾ
– കേൾവിക്കുറവുള്ള ഡൗൺ സിൻഡ്രോം ഉള്ള കുട്ടികൾ
– കേൾവിക്കുറവുള്ള വളർച്ചാ പരിമിതികൾ നേരിടുന്ന കുട്ടികൾ
– കോക്ലിയർ ഇംപ്ലാന്റ് ശസ്ത്രക്രിയയ്ക്ക് വിധേയരായ കുട്ടികൾ
ചേരാനുള്ള നടപടികൾ:
– ഹമദ് മെഡിക്കൽ കോർപ്പറേഷനിലെ സ്പെഷ്യലിസ്റ്റുകൾ കുട്ടിയുടെ ആരോഗ്യസ്ഥിതി വിലയിരുത്തുന്നു
– ഓരോ കുട്ടിക്കും അനുയോജ്യമായ റീഹാബിലിറ്റേഷൻ, വിദ്യാഭ്യാസ പരിപാടി എച്ച്എംസിയിലെ സ്പെഷ്യലിസ്റ്റുകൾ നിർണ്ണയിക്കുന്നു
– കിന്റർഗാർട്ടനിലേക്കുള്ള പ്രവേശനം ഹമദ് മെഡിക്കൽ കോർപ്പറേഷൻ വഴി മാത്രമാണ് നൽകുക.
