സെപ്റ്റംബർ 17 ബുധനാഴ്ച ദേശീയ സീസണൽ ഇൻഫ്ലുവൻസ വാക്സിനേഷൻ, അവബോധ കാമ്പയിൻ ആരംഭിക്കുമെന്ന് പൊതുജനാരോഗ്യ മന്ത്രാലയം (MoPH) പ്രഖ്യാപിച്ചു. ഹമദ് മെഡിക്കൽ കോർപ്പറേഷൻ (HMC), പ്രൈമറി ഹെൽത്ത് കെയർ കോർപ്പറേഷൻ (PHCC), പൊതു, അർദ്ധ-സർക്കാർ, സ്വകാര്യ ആരോഗ്യ സംരക്ഷണ സൗകര്യങ്ങൾ എന്നിവയുമായി സഹകരിച്ചായിരിക്കും ക്യാമ്പയിൻ.
ഇൻഫ്ലുവൻസ വാക്സിൻ എല്ലാ പിഎച്ച്സിസി കേന്ദ്രങ്ങളിലും, ആഭ്യന്തര, പ്രതിരോധ മന്ത്രാലയങ്ങളുമായി ബന്ധപ്പെട്ട ആരോഗ്യ സംരക്ഷണ സൗകര്യങ്ങൾ, ഖത്തർ എനർജി, എല്ലാ സ്വകാര്യ ആശുപത്രികൾ, ഖത്തറിലുടനീളമുള്ള അമ്പതിലധികം സ്വകാര്യ ആരോഗ്യ സംരക്ഷണ സൗകര്യങ്ങൾ എന്നിവയിൽ സൗജന്യമായി ലഭ്യമാണ്.
ആരോഗ്യകരവും സുരക്ഷിതവുമായ തൊഴിൽ അന്തരീക്ഷം ഉറപ്പാക്കുന്നതിനുള്ള പ്രതിജ്ഞാബദ്ധതയുടെ ഭാഗമായി, സെപ്റ്റംബർ 24, 25 ബുധൻ, വ്യാഴം ദിവസങ്ങളിൽ ജീവനക്കാർക്കായി ഒരു ആന്തരിക വാക്സിനേഷൻ കാമ്പയിൻ സംഘടിപ്പിക്കും.
ഹെർഡ് ഇമ്യൂണിറ്റി വർദ്ധിപ്പിക്കുന്നതിനും ഇൻഫ്ലുവൻസയുമായി ബന്ധപ്പെട്ട ആരോഗ്യ സങ്കീർണതകൾ കുറയ്ക്കുന്നതിനുമാണ് ഈ കാമ്പയിൻ ലക്ഷ്യമിടുന്നത്. പ്രത്യേകിച്ച് ശൈത്യകാലത്ത് ഇൻഫ്ലുവൻസ വാക്സിനേഷന്റെ പ്രാധാന്യത്തെക്കുറിച്ച് പൊതുജന അവബോധം വളർത്തുന്നതിനുള്ള മന്ത്രാലയത്തിന്റെ ശ്രമങ്ങളുടെ ഭാഗമാണിത്.
ഈ സീസണിൽ സാധാരണയായി അണുബാധ നിരക്കിൽ വർദ്ധനവുണ്ടാകും. ഇൻഫ്ലുവൻസയെക്കുറിച്ചുള്ള തെറ്റിദ്ധാരണകൾ തിരുത്താനും അതിന്റെ അപകടസാധ്യതകൾ എടുത്തുകാണിക്കാനും കാമ്പയിൻ ശ്രമിക്കുന്നു.
ഇൻഫ്ലുവൻസ വൈറസ് വർഷാവർഷം തുടർച്ചയായ മ്യൂട്ടേഷനുകൾക്ക് വിധേയമാകുന്നു. ഇത് മതിയായ സംരക്ഷണം ഉറപ്പാക്കാൻ വാർഷിക വാക്സിനേഷൻ അനിവാര്യമാക്കുന്നു.
ഇൻഫ്ലുവൻസ ഒരു ലളിതമായ ജലദോഷം മാത്രമല്ല, ന്യുമോണിയ, വിട്ടുമാറാത്ത രോഗങ്ങളുടെ വർദ്ധനവ് തുടങ്ങിയ ഗുരുതരമായ സങ്കീർണതകൾക്ക് കാരണമായേക്കാമെന്നും ചില സന്ദർഭങ്ങളിൽ, അത് മരണത്തിനോ സ്ഥിരമായ വൈകല്യത്തിനോ പോലും കാരണമായേക്കാമെന്നും മന്ത്രാലയം പറഞ്ഞു.
പ്രമേഹം, ആസ്ത്മ, ഹൃദയം, ശ്വാസകോശ സംബന്ധമായ അസുഖങ്ങൾ, വൃക്കരോഗങ്ങൾ, രോഗപ്രതിരോധ ശേഷി കുറഞ്ഞവർ, അറുപത് വയസ്സിനു മുകളിലുള്ള മുതിർന്ന പൗരന്മാർ, ആറ് മാസത്തിനും അഞ്ച് വയസ്സിനും ഇടയിൽ പ്രായമുള്ള കുട്ടികൾ, ഗർഭിണികൾ, ആരോഗ്യ പ്രവർത്തകർ തുടങ്ങി ഏറ്റവും കൂടുതൽ അപകടസാധ്യതയുള്ള ഗ്രൂപ്പുകളെയാണ് ഈ കാമ്പയിൻ ലക്ഷ്യമിടുന്നത്.
മുകളിൽ സൂചിപ്പിച്ച ഗ്രൂപ്പുകളിൽ പെട്ടവർ, സീസണൽ ഇൻഫ്ലുവൻസ വാക്സിൻ എത്രയും വേഗം എടുക്കണമെന്ന് ആരോഗ്യ മന്ത്രാലയം പൗരന്മാരോടും താമസക്കാരോടും അഭ്യർത്ഥിച്ചു. കൂടാതെ എല്ലാ സമൂഹ അംഗങ്ങളും കഴിവതും നേരത്തെ വാക്സിനേഷൻ എടുക്കാൻ മന്ത്രാലയം പ്രോത്സാഹിപ്പിക്കുന്നു.
