സ്വകാര്യ സ്ഥാപനങ്ങളെ പിന്തുണയ്ക്കലും ലക്ഷ്യം; ഗവണ്മെന്റ് പ്രൊക്യുർമെന്റ് പ്ലാൻ ഫോറം 2026 ആരംഭിച്ചു
16-ലധികം സർക്കാർ സ്ഥാപനങ്ങളുടെ പങ്കാളിത്തത്തോടെ, ഗവൺമെന്റ് പ്രൊക്യുർമെന്റ് പ്ലാൻ ഫോറം 2026 ന് ഇന്നലെ ഔദ്യോഗിക ഉദ്ഘാടനമായി. പൊതു, സ്വകാര്യ മേഖലകളിൽ നിന്നുള്ള വിതരണക്കാർക്ക് ഡിജിറ്റൽ സംഭരണ സംവിധാനത്തിലേക്കുള്ള അവസരങ്ങൾ ലഭ്യമാക്കുന്ന പ്രൊക്യുർമെന്റ് പ്ലാൻ ഫോറം സുതാര്യതയും കാര്യക്ഷമതയും വർദ്ധിപ്പിക്കുന്നു.
ധനകാര്യ മന്ത്രാലയത്തിന്റെയും ഖത്തർ ഡിവലപ്മെന്റ് ബാങ്കിന്റെയും രക്ഷാകർതൃത്വത്തിലും വാണിജ്യ വ്യവസായ മന്ത്രാലയത്തിന്റെയും ഖത്തർ ചേംബറിന്റെയും സഹകരണത്തോടെയും നടക്കുന്ന ഗവൺമെന്റ് പ്രൊക്യുർമെന്റ് പ്ലാൻ 2026 ഫോറത്തിന്റെ മൂന്നാം പതിപ്പ് ഒക്ടോബർ 22 വരെ നടക്കും.
ധനകാര്യ മന്ത്രി അലി ബിൻ അഹമ്മദ് അൽ കുവാരി, മുനിസിപ്പാലിറ്റി മന്ത്രി അബ്ദുല്ല ബിൻ ഹമദ് ബിൻ അബ്ദുല്ല അൽ-അത്തിയ, മന്ത്രിമാർ, മുതിർന്ന ഉദ്യോഗസ്ഥർ, സർക്കാർ സ്ഥാപനങ്ങളുടെ പ്രതിനിധികൾ, ബിസിനസുകാർ എന്നിവർ ഫോറത്തിൽ പങ്കെടുത്തു.
2026 ലെ ഗവൺമെന്റ് പ്രൊക്യുർമെന്റ് പ്ലാനിന്റെ ഭാഗമായി 4,464 ടെൻഡറുകൾ നൽകിയിട്ടുണ്ടെന്ന് ഉദ്ഘാടന പ്രസംഗം നടത്തിയ ധനകാര്യ മന്ത്രാലയത്തിലെ ഗവൺമെന്റ് പ്രൊക്യുർമെന്റ് റെഗുലേഷൻ വകുപ്പ് ഡയറക്ടർ നയീഫ് അൽ-അഹ്ബാബി പറഞ്ഞു.
ഖത്തർ നാഷണൽ വിഷൻ 2030 ന് അനുസൃതമായി, ഗവൺമെന്റ് ചെലവുകളുടെ കാര്യക്ഷമത വർദ്ധിപ്പിക്കുക, സ്വകാര്യ മേഖലയെ പിന്തുണയ്ക്കുക, സുസ്ഥിര സാമ്പത്തിക വളർച്ച കൈവരിക്കുക എന്നിവ ലക്ഷ്യമിട്ടുള്ള പുതിയ നിർദ്ദേശങ്ങളുടെ ചട്ടക്കൂടിനുള്ളിലാണ് ഫോറം നടക്കുന്നത്.
