ദോഹ: ഖത്തറിലെ ലുബസൈറിലുള്ള അൽ മസായൻ മേഖലയിൽ അഞ്ചാമത് ഖത്തർ ഒട്ടകമേളയായ ‘ജസിലത്ത് അൽ-അത്ത’ 2026-ന് ഇന്ന് (ഞായർ) തുടക്കമാകും. ഗൾഫ് സഹകരണ കൗൺസിൽ (GCC) രാജ്യങ്ങളിൽ നിന്നുള്ള റെക്കോർഡ് പങ്കാളിത്തത്തോടെ സംഘടിപ്പിക്കുന്ന മേള ഫെബ്രുവരി 10 വരെ നീണ്ടുനിൽക്കും.
പ്രാദേശിക, ഗൾഫ് ഒട്ടക മത്സരങ്ങളുടെ ചരിത്രത്തിലെ ഏറ്റവും ശ്രദ്ധേയമായ പരിപാടികളിലൊന്നായി മാറിയ ഈ മേളയിൽ 31 ദിവസങ്ങളിലായി ആവേശകരമായ പോരാട്ടങ്ങളാണ് നടക്കുക.
മത്സര വിഭാഗങ്ങൾ:
ആകെ 119 കിരീടങ്ങൾക്കായി മൂന്ന് പ്രധാന വിഭാഗങ്ങളിലായാണ് മത്സരങ്ങൾ നടക്കുന്നത്:
- അൽ മഗതീർ (Al Magateer): 37 റൗണ്ടുകൾ.
- അസായേൽ (Asayel): 44 റൗണ്ടുകൾ.
- മുജാഹിം (Mujahim): 38 റൗണ്ടുകൾ.
ഇന്നത്തെ മത്സരങ്ങൾ:
ആദ്യ ദിനമായ ഇന്ന് ‘അൽ മഗതീർ’ വിഭാഗത്തിലെ മൂന്ന് റൗണ്ട് മത്സരങ്ങളാണ് നടക്കുക. ‘ഷുവൽ സഫ്ർ’ (Shual Safr), ‘ഷാഖേ ഹമർ’ (Shaqeh Hamar), ‘വാദ്’ (Wadh) എന്നീ ക്ലാസുകളിലായാണ് മത്സരങ്ങൾ.
വിജയികളെ കാത്തിരിക്കുന്നത് ആകർഷകമായ സമ്മാനങ്ങളാണ്. മൂന്ന് പ്രതീകാത്മക ട്രോഫികൾക്ക് പുറമെ മൂന്ന് വാഹനങ്ങളും 12 ക്യാഷ് പ്രൈസുകളും വിതരണം ചെയ്യും. ഒന്നാം സ്ഥാനത്തെത്തുന്നവർക്ക് ‘ടാങ്ക് 500’ (Tank 500) വാഹനവും രണ്ട് മുതൽ അഞ്ച് വരെയുള്ള സ്ഥാനക്കാർക്ക് പണവുമാണ് സമ്മാനമായി ലഭിക്കുക.
