ആസ്പയർ റമദാൻ സ്പോർട്സ് ഫെസ്റ്റിവൽ ഫെബ്രുവരി 22 മുതൽ; 12 ദിവസത്തെ കായിക മാമാങ്കത്തിന് ദോഹ ഒരുങ്ങുന്നു

​ദോഹ: ഖത്തറിലെ കായികപ്രേമികൾ കാത്തിരിക്കുന്ന ‘ആസ്പയർ റമദാൻ സ്പോർട്സ് ഫെസ്റ്റിവൽ 2026’ ഫെബ്രുവരി 22 മുതൽ ആരംഭിക്കുമെന്ന് ആസ്പയർ സോൺ ഫൗണ്ടേഷൻ (AZF) അറിയിച്ചു. മാർച്ച് 6 വരെ നീണ്ടുനിൽക്കുന്ന ഈ കായികമേളയിൽ 11 വ്യത്യസ്ത ഇനങ്ങളിലായി വിപുലമായ മത്സരങ്ങളാണ് ഒരുക്കിയിരിക്കുന്നത്.

വിശുദ്ധ റമദാൻ മാസത്തിൽ ആരോഗ്യകരമായ ജീവിതശൈലി പ്രോത്സാഹിപ്പിക്കുന്നതിനായി സംഘടിപ്പിക്കുന്ന ഈ ഫെസ്റ്റിവൽ എല്ലാ ദിവസവും രാത്രി 8:00 മുതൽ അർദ്ധരാത്രി വരെയാണ് നടക്കുക.

​പ്രധാന മത്സരങ്ങളും തീയതികളും:

• ​ഫെബ്രുവരി 22: ഫുട്ബോൾ (എംബസികൾക്കായി), ആസ്പറ്റാർ ഫുട്ബോൾ ടൂർണമെന്റ്, പുരുഷന്മാരുടെ ബാസ്കറ്റ്ബോൾ എന്നിവയോടെ തുടക്കം കുറിക്കും.
• ​ഫെബ്രുവരി 24: ഭിന്നശേഷിക്കാർക്കായുള്ള ടേബിൾ ടെന്നീസ്, വനിതകളുടെ ബാസ്കറ്റ്ബോൾ.
• ​ഫെബ്രുവരി 25: ഫാമിലി നൈറ്റ് റൺ (ആസ്പയർ പാർക്കിൽ).
• ​ഫെബ്രുവരി 26: യുവാക്കളുടെ ബാസ്കറ്റ്ബോൾ, നീന്തൽ മത്സരം (ഹമദ് അക്വാട്ടിക് സെന്ററിൽ).
• ​ഫെബ്രുവരി 27 – 28: ബീച്ച് വോളിബോൾ മത്സരം.
• ​ഫെബ്രുവരി 28 – മാർച്ച് 2: വനിതകളുടെ പാഡൽ (Padel) ടൂർണമെന്റ്.
• ​മാർച്ച് 4: വനിതകളുടെ ഫുട്സാൽ (Futsal) മത്സരം.

​ആസ്പയർ സോണിലെ ഇൻഡോർ, ഔട്ട്‌ഡോർ പിച്ചുകളിലായാണ് മത്സരങ്ങൾ നടക്കുന്നത്. കുട്ടികൾക്കും മുതിർന്നവർക്കും സ്ത്രീകൾക്കും ഒരുപോലെ പങ്കെടുക്കാവുന്ന രീതിയിലാണ് ഇവ ക്രമീകരിച്ചിരിക്കുന്നത്. താൽപ്പര്യമുള്ളവർക്ക് ആസ്പയർ സോണിന്റെ ഔദ്യോഗിക വെബ്സൈറ്റ് വഴി രജിസ്റ്റർ ചെയ്യാവുന്നതാണ്.