ഹോട്ടലുകളിലെ ഭക്ഷ്യസുരക്ഷ ഉറപ്പാക്കാൻ ഇൻസ്‌പെക്ഷൻ ക്യാമ്പയിൻ ആരംഭിച്ച് അൽ റയ്യാൻ മുനിസിപ്പാലിറ്റി

ഹോട്ടലുകളിലെ ഭക്ഷ്യസുരക്ഷ പരിശോധിക്കുന്നതിനായി അൽ റയ്യാൻ മുനിസിപ്പാലിറ്റി ഒരു പ്രധാനപ്പെട്ട ഇൻസ്‌പെക്ഷൻ കാമ്പയിൻ ആരംഭിച്ചു. നിലവിലുള്ള ആരോഗ്യ നിയമങ്ങളും സുരക്ഷാ മാനദണ്ഡങ്ങളും എല്ലാ ഫുഡ് ബിസിനസുകളും പാലിക്കുന്നുണ്ടെന്ന് ഉറപ്പാക്കുക എന്നതാണ് ലക്ഷ്യം.

കാമ്പയിൻ്റെ ഭാഗമായി, വനിതാ ഹെൽത്ത് ഇൻസ്പെക്ടർമാർക്കായി ഒരു പ്രായോഗിക പരിശീലന വർക്ക്ഷോപ്പ് നടന്നു. പരിശോധനകൾ എങ്ങനെ നടത്താമെന്നും ആരോഗ്യ ആവശ്യകതകൾ നിറവേറ്റുന്നുണ്ടോയെന്ന് എങ്ങിനെ പരിശോധിക്കാമെന്നും അവർ പഠിച്ചു. ഈ പരിശീലനം അവരുടെ കഴിവുകൾ മെച്ചപ്പെടുത്താനും ടീമിന്റെ അറിവ് മെച്ചപ്പെടാനും സഹായിച്ചു.

ഹോട്ടൽ ജീവനക്കാർക്കുള്ള ബോധവൽക്കരണ സെഷനുകളും കാമ്പയിനിൽ ഉൾപ്പെടുത്തിയിരുന്നു. ഭക്ഷണം ഉണ്ടാക്കുന്നതും സംഭരിക്കുന്നതും മുതൽ അത് കൊണ്ടുപോകുന്നതും വിതരണം ചെയ്യുന്നതും വിളമ്പുന്നതും വരെയുള്ള ഓരോ ഘട്ടത്തിലും ആരോഗ്യ മാനദണ്ഡങ്ങൾ പാലിക്കേണ്ടതിന്റെ പ്രാധാന്യം ഈ സെഷനുകൾ വിശദീകരിച്ചു.

പൊതുജനാരോഗ്യം സംരക്ഷിക്കുക, ഭക്ഷണത്തിന്റെ ഗുണനിലവാരം മെച്ചപ്പെടുത്തുക, ഉപഭോക്താക്കളിൽ വിശ്വാസം വളർത്തുക, നഗരത്തെ സന്ദർശകർക്കും താമസക്കാർക്കും സുരക്ഷിതവും ആരോഗ്യകരവുമായ സ്ഥലമാക്കി മാറ്റുക എന്നിവയാണ് ഇതിലൂടെ അൽ റയ്യാൻ മുനിസിപ്പാലിറ്റി ലക്ഷ്യമിടുന്നത്.

ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ് 👇https://chat.whatsapp.com/JJuKuHKpVnF2oI3YhApCdt?mode=r_t