മസ്കറ്റ്: ഗൾഫ് സഹകരണ കൗൺസിൽ (ജി.സി.സി) രാജ്യങ്ങളിലെ ജനസംഖ്യ 2050-ഓടെ ഏകദേശം 8.36 കോടിയിലേക്ക് (83.6 ദശലക്ഷം) ഉയരുമെന്ന് ഗൾഫ് സ്റ്റാറ്റിസ്റ്റിക്കൽ സെന്റർ പ്രവചിക്കുന്നു. മേഖലയിലെ സാമ്പത്തിക വികസനം, തൊഴിൽ വിപണിയിലെ ഡിമാൻഡ് എന്നിവയുടെ അടിസ്ഥാനത്തിൽ 2025 മുതൽ 2050 വരെയുള്ള കാലയളവിൽ ജനസംഖ്യയിൽ സ്ഥിരമായ വളർച്ചയുണ്ടാകുമെന്നാണ് മസ്കറ്റ് ആസ്ഥാനമായി പ്രവർത്തിക്കുന്ന കേന്ദ്രത്തിന്റെ റിപ്പോർട്ട് വ്യക്തമാക്കുന്നത്.
പ്രായഘടനയിലെ മാറ്റങ്ങൾ:
വരും വർഷങ്ങളിൽ ഗൾഫ് ജനസംഖ്യയുടെ ഘടനയിൽ വലിയ മാറ്റങ്ങൾ സംഭവിക്കുമെന്ന് റിപ്പോർട്ട് മുന്നറിയിപ്പ് നൽകുന്നു. 65 വയസ്സിനു മുകളിൽ പ്രായമുള്ളവരുടെ എണ്ണം 2050-ഓടെ നിലവിലുള്ളതിന്റെ ഇരട്ടിയിലധികമായി വർധിച്ച് 5.5 ദശലക്ഷം കടക്കുമെന്നാണ് കണക്കാക്കുന്നത്. ഈ മാറ്റം ഉൾക്കൊള്ളാൻ തക്കവിധം നഗര ആസൂത്രണം, ആരോഗ്യ പരിരക്ഷാ സംവിധാനം, സാമൂഹിക സുരക്ഷാ പദ്ധതികൾ എന്നിവയിൽ ദീർഘകാല പോളിസികൾ നടപ്പിലാക്കേണ്ടത് അത്യന്താപേക്ഷിതമാണെന്ന് റിപ്പോർട്ട് ചൂണ്ടിക്കാട്ടുന്നു.
നിലവിലെ അവസ്ഥ:
2024 അവസാനത്തെ കണക്കനുസരിച്ച് ജി.സി.സിയിലെ ആകെ ജനസംഖ്യ 6.15 കോടിയാണ്. 2019-നെ അപേക്ഷിച്ച് 8.5 ദശലക്ഷം പേരുടെ വർധനവാണ് അഞ്ച് വർഷത്തിനിടെ ഉണ്ടായത്. പ്രതിവർഷം ശരാശരി 2.8 ശതമാനം എന്ന നിലയിലാണ് ഗൾഫിലെ ജനസംഖ്യാ വളർച്ച. ഇത് ആഗോള ശരാശരിയേക്കാൾ മൂന്നിരട്ടി വേഗതയിലാണ്.
മറ്റ് പ്രധാന വിവരങ്ങൾ:
- തൊഴിൽ ശേഷിയുള്ളവർ (15-64 വയസ്സ്): ആകെ ജനസംഖ്യയുടെ 76.7 ശതമാനം.
- കുട്ടികൾ (0-14 വയസ്സ്): 20.6 ശതമാനം.
- പ്രായമായവർ: നിലവിൽ ഏകദേശം 2.6 ശതമാനം.
- ലിംഗാനുപാതം: ഗൾഫ് രാജ്യങ്ങളിൽ 62.7 ശതമാനം പുരുഷന്മാരും 37.3 ശതമാനം സ്ത്രീകളുമാണുള്ളത് (ഓരോ 100 സ്ത്രീകൾക്കും 168 പുരുഷന്മാർ എന്ന അനുപാതം)
യുവജനങ്ങളുടെ വലിയൊരു വിഭാഗം നിലവിലുള്ളത് സാമ്പത്തിക വളർച്ചയ്ക്ക് വലിയ അവസരങ്ങൾ നൽകുന്നുണ്ടെങ്കിലും, ഭാവിയിൽ പ്രായമായവരുടെ എണ്ണം കൂടുന്നത് പോളിസി രൂപീകരണത്തിൽ വെല്ലുവിളികൾ സൃഷ്ടിച്ചേക്കാമെന്നും റിപ്പോർട്ട് സൂചിപ്പിക്കുന്നു.
