വിവാഹ ദിവസം നടന്ന ദാരുണമായ അപകടത്തെ തുടർന്ന് കൊച്ചിയിലെ വിപിഎസ് ലേക്ഷോർ ആശുപത്രിയിലെ എമർജൻസി വാർഡിനുള്ളിൽ താലികെട്ടേണ്ടി വന്ന മലയാളി യുവ ദമ്പതികൾക്ക് ഗൾഫിൽ നിന്ന് അപ്രതീക്ഷിത സഹായം. വിപിഎസ് ലേക്ഷോർ ആശുപത്രിയുടെയും അബുദാബി ആസ്ഥാനമായുള്ള ബുർജീൽ ഹോൾഡിംഗ്‌സിന്റെയും ചെയർമാനായ ഡോ. ഷംഷീർ വയലിൽ വധു ആവാനിയുടെ മുഴുവൻ ചികിത്സാ ചെലവും വഹിക്കുമെന്ന് അറിയിച്ചു.
അപകടത്തെക്കുറിച്ചും ദമ്പതികൾക്ക് വിവാഹം കഴിക്കേണ്ടി വന്ന അസാധാരണ സാഹചര്യത്തെക്കുറിച്ചും അറിഞ്ഞ ശേഷം ശനിയാഴ്ച രാവിലെ ഡോക്ടർ ഷംഷീർ മെഡിക്കൽ സംഘവുമായി ബന്ധപ്പെട്ടതായി ആശുപത്രി അധികൃതർ പറഞ്ഞു. കുടുംബങ്ങൾക്ക് സാമ്പത്തിക ബാധ്യതയില്ലാതെ ആവാനിയുടെ ചികിത്സ, ശസ്ത്രക്രിയ, റീഹാബിലിറ്റേഷൻ എന്നിവ തുടരണമെന്ന് അദ്ദേഹം നിർദ്ദേശിച്ചു.
“ഏതാനും മണിക്കൂറുകൾക്കുള്ളിൽ ഈ ദമ്പതികൾ നേരിട്ടത് സങ്കൽപ്പിക്കാൻ പോലും കഴിയാത്തതായിരുന്നു,” ഡോ. ഷംഷീർ പറഞ്ഞു.
“അവരുടെ ധൈര്യം എല്ലാവരെയും സ്പർശിച്ചു. ആവണിയുടെ രോഗശാന്തിയിൽ പൂർണ്ണമായും ശ്രദ്ധ കേന്ദ്രീകരിക്കണമെന്നും അവൾക്ക് ആവശ്യമായ എല്ലാ പരിചരണവും ലഭിക്കണമെന്നും ഞങ്ങൾ ആഗ്രഹിക്കുന്നു. ഈ യാത്രയിലുടനീളം ആശുപത്രിയും മെഡിക്കൽ സംഘവും ഒരു വലിയ കുടുംബത്തെപ്പോലെ അവരോടൊപ്പം നിൽക്കും,” അദ്ദേഹം വ്യക്തമാക്കി.
വെള്ളിയാഴ്ച പുലർച്ചെ 3 മണിക്ക്, കോട്ടയം ജില്ലയിലെ കുമരകത്ത് വിവാഹത്തിനുള്ള ഒരുക്കങ്ങൾക്കായി യാത്ര ചെയ്യുന്നതിനിടെയാണ് ആവണിയുടെ കാർ അപകടത്തിൽപ്പെട്ടത്. നട്ടെല്ലിനും ഇടുപ്പിനും പരിക്കേറ്റതിനെ തുടർന്ന് ആദ്യം കോട്ടയം മെഡിക്കൽ കോളേജിലേക്ക് കൊണ്ടുപോയി. തുടർന്ന് വിദഗ്ധ ചികിത്സയ്ക്കായി വിപിഎസ് ലേക്ഷോർ ആശുപത്രിയിലേക്ക് മാറ്റി.
വിശദമായ വിലയിരുത്തലിനുശേഷം, മെഡിക്കൽ സംഘം രാവിലെ 9:35 ന് ശസ്ത്രക്രിയ ആരംഭിക്കുകയും ഉച്ചയോടെ പൂർത്തിയാക്കുകയും ചെയ്തു. എമർജൻസി മെഡിസിൻ, അനസ്തേഷ്യ, കാർഡിയോതൊറാസിക് സർജറി എന്നിവയിലെ വിദഗ്ധരുടെ പിന്തുണയോടെ ന്യൂറോ സർജറി മേധാവി ഡോ. സുധീഷ് കരുണാകരന്റെ നേതൃത്വത്തിലാണ് ശസ്ത്രക്രിയ നടന്നത്.
