വടക്കൻ പ്രദേശങ്ങളിലെ റോഡ് വികസന പ്രവർത്തനങ്ങൾ പൂർത്തിയാക്കിയതായി പൊതുമരാമത്ത് ‘അഷ്ഗൽ’ അറിയിച്ചു.
സുരക്ഷാ സംവിധാനങ്ങൾ ഒരുക്കുന്നതിനും അടിസ്ഥാന സൗകര്യ ശൃംഖലകൾ നടപ്പിലാക്കുന്നതിനും പുറമേ, സ്ഥിരമായ റോഡുകൾ മെച്ചപ്പെടുത്തുന്നതും താമസക്കാർക്കും സ്ഥാപനങ്ങൾക്കും സേവനം നൽകുന്നതിനായി താൽക്കാലിക റോഡുകൾ നിർമ്മിക്കുന്നതും പദ്ധതിയിൽ വരുന്നു. വികസന പ്രവർത്തനങ്ങളിലൂടെ രാജ്യത്തിന്റെ വടക്കൻ പ്രദേശങ്ങളിലെ വിവിധ ആവശ്യങ്ങൾ നിറവേറ്റുക എന്നതാണ് പദ്ധതിയുടെ പ്രധാന ലക്ഷ്യം.
84 കിലോമീറ്റർ ദൈർഘ്യമുള്ള സ്ഥിരവും താൽക്കാലികവുമായ റോഡുകൾ നിർമ്മിക്കുക, ഏകദേശം 746 തെരുവ് വിളക്കു തൂണുകൾ സ്ഥാപിക്കുക, കാറുകൾക്കും ബസുകൾക്കും 22,600 ലധികം പാർക്കിംഗ് സ്ഥലങ്ങൾ നൽകുക, അടിസ്ഥാന സൗകര്യ ശൃംഖലകൾ വികസിപ്പിക്കുക, സൗന്ദര്യവൽക്കരണം, ലാൻഡ്സ്കേപ്പിംഗ് ജോലികൾ, കാൽനടയാത്രക്കാർക്കും സൈക്കിൾ പാതകൾക്കും സൗകര്യം ഒരുക്കുക എന്നിവയും ഇതിൽ ഉൾപ്പെടുന്നു.
കൂടാതെ, വടക്കൻ പ്രദേശങ്ങളിൽ അൽ അൻഡാലസ് വിദ്യാഭ്യാസ സമുച്ചയം (റൗദത്ത് അൽ ഹമാമ), അൽ കഅബാൻ സിറ്റി, പാണ്ട ഹൗസ് എന്നിവയെ അൽ മജ്ദ്, അൽ ഖോർ, അൽ ഷമാൽ റോഡുകൾ പോലുള്ള പ്രധാന റൂട്ടുകളുമായി ബന്ധിപ്പിക്കുന്ന ഒരു സമഗ്ര റോഡ് ശൃംഖല പൂർത്തിയായി.
അറബ് ലീഗ് സ്ട്രീറ്റിലൂടെയുള്ള ഒരു സർവീസ് റോഡ്, അൽ ബെയ്ത്, ലുസൈൽ സ്റ്റേഡിയങ്ങൾക്കായി 20,000 പാർക്കിംഗ് സ്ഥലങ്ങൾ, ലുസൈലിൽ 285 ബസ് പാർക്കിംഗ് സ്ഥലങ്ങൾ, ഒരു മഴവെള്ള സംഭരണിക്ക് മുകളിൽ നിർമ്മിച്ച 22,500 ചതുരശ്ര മീറ്റർ വിസ്തീർണ്ണമുള്ള ഒരു ഗ്രീൻ പാർക്ക് എന്നിവയും പദ്ധതിയിൽ ഉൾപ്പെടുന്നു.
റൗദത്ത് അൽ ഹമാമ പാർക്കിന് ചുറ്റും അടിസ്ഥാന സൗകര്യങ്ങൾ, ലൈറ്റിംഗ്, റോഡുകൾ എന്നിവ പൂർത്തിയായി, അൽ ഫുറൂഷിലും അൽ തമീദിലും ഗ്രേഡിംഗ് ജോലികൾ നടന്നു. സമീപത്തുള്ള നിരവധി പ്രദേശങ്ങളിൽ താൽക്കാലിക റോഡുകൾ, സൈനേജുകൾ, മാർക്കിംഗ് ജോലികൾ എന്നിവയും പൂർത്തിയായി.
