ഖത്തറിൽ പുതിയ ടെക്നോളജി സ്റ്റാർട്ടപ്പുകളെയും സംരംഭകരെയും ആകർഷിക്കുന്നതിനായി ഖത്തർ ഫിനാൻഷ്യൽ സെന്റർ (QFC) വൻ സാമ്പത്തിക ആനുകൂല്യങ്ങളോട് കൂടിയ പദ്ധതി പ്രഖ്യാപിച്ചു. വെബ് സമ്മിറ്റ് ഖത്തറിൽ പങ്കെടുക്കുന്നവർക്ക് ക്യു.എഫ്.സി പ്ലാറ്റ്ഫോമിൽ സൗജന്യമായി കമ്പനികൾ രജിസ്റ്റർ ചെയ്യാൻ ഈ പദ്ധതി വഴി സാധിക്കും.
പ്രധാന ആനുകൂല്യങ്ങൾ:
- സൗജന്യ ലൈസൻസ്: മൂന്ന് വർഷത്തേക്ക് സൗജന്യമായി ലൈസൻസ് ലഭിക്കും. സാധാരണയായി ഇതിന് പ്രതിവർഷം ഏകദേശം 5,000 ഡോളർ ആണ് ചിലവ് വരുന്നത്.
- രജിസ്ട്രേഷൻ ഫീ ഒഴിവാക്കി: സാധാരണയായി ഈടാക്കുന്ന 500 ഡോളർ അപേക്ഷാ ഫീസും ഈ പദ്ധതിയിൽ ഒഴിവാക്കിയിട്ടുണ്ട്.
- ലാഭം: ഈ ഓഫർ വഴി ഒരു സംരംഭകന് ഏകദേശം 15,500 ഡോളർ വരെ ലാഭിക്കാൻ സാധിക്കുമെന്ന് ക്യു.എഫ്.സി പ്രതിനിധി അബ്ദുള്ള അൽ സുലൈത്തി അറിയിച്ചു
നിബന്ധനകൾ:
- കമ്പനി ഒരു ലിമിറ്റഡ് ലയബിലിറ്റി കമ്പനി (LLC) ആയിരിക്കണം.
- കമ്പനിയുടെ പ്രവർത്തനങ്ങളിൽ കുറഞ്ഞത് ഒന്നിലെങ്കിലും സാങ്കേതികവിദ്യയുമായി (Technology) ബന്ധപ്പെട്ടതായിരിക്കണം.
- കുറഞ്ഞത് ഒരു ഷെയർഹോൾഡർക്കെങ്കിലും സാധുവായ ഖത്തർ റെസിഡൻസ് പെർമിറ്റ് (QID) ഉണ്ടായിരിക്കണം. എന്നാൽ ഖത്തറി സ്വദേശിയായ പാർട്ണർ നിർബന്ധമില്ല.
- കമ്പനിയുടെ ലാഭത്തിന്മേൽ 10% കോർപ്പറേറ്റ് നികുതി ബാധകമായിരിക്കും.
എങ്ങനെ അപേക്ഷിക്കാം?
- വെബ് സമ്മിറ്റിലെ ക്യു.എഫ്.സി പവലിയൻ സന്ദർശിച്ച് അവിടെയുള്ള ക്യു.ആർ (QR) കോഡ് സ്കാൻ ചെയ്യുക.
- വെബ് സമ്മിറ്റ് ടിക്കറ്റ് നമ്പറും വ്യക്തിഗത വിവരങ്ങളും ഉപയോഗിച്ച് “Start Your Setup” ഫോം പൂരിപ്പിക്കുക.
- യോഗ്യതയുള്ളവർക്ക് അപേക്ഷാ നടപടികൾ പൂർത്തിയാക്കാനുള്ള ലിങ്ക് ലഭിക്കും.
ഖത്തറിനെ ഒരു ആഗോള സാങ്കേതിക ഹബ്ബാക്കി മാറ്റുന്നതിന്റെയും വിദേശ നിക്ഷേപങ്ങളെ പ്രോത്സാഹിപ്പിക്കുന്നതിന്റെയും ഭാഗമായാണ് ഈ നടപടി. കൂടുതൽ വിവരങ്ങൾക്കും രജിസ്ട്രേഷനുമായി വെബ് സമ്മിറ്റിലെ ക്യു.എഫ്.സി ബൂത്ത് സന്ദർശിക്കാവുന്നതാണ്.
