ദോഹ: സമുദ്ര ഗതാഗത സേവന രംഗത്ത് പ്രവർത്തിക്കുന്ന എല്ലാ സ്ഥാപനങ്ങളും സുതാര്യതയും നീതിപൂർവകമായ നടപടികളും കർശനമായി പാലിക്കണമെന്ന് ഖത്തർ ഗതാഗത മന്ത്രാലയത്തിന് കീഴിലുള്ള മാരിടൈം ട്രാൻസ്പോർട്ട് അഫയേഴ്സ് നിർദ്ദേശിച്ചു.
സമുദ്ര നിയമങ്ങളായ 1980-ലെ 15-ാം നമ്പർ നിയമം, 2004-ലെ 4-ാം നമ്പർ നിയമം (നാവിഗേഷണൽ ഏജൻസികളുടെ പ്രവർത്തന നിയന്ത്രണം), 2012-ലെ 12-ാം നമ്പർ നിയമം (മാരിടൈം ഷിപ്പിംഗ് ഇൻ്റർമീഡിയറികളുടെ സേവന നിയന്ത്രണം) എന്നിവയിലെ വ്യവസ്ഥകൾ കൃത്യമായി പാലിക്കണമെന്ന് മന്ത്രാലയം ഊന്നിപ്പറഞ്ഞു.
അമിത നിരക്കിനെതിരെ (Surcharges) മുന്നറിയിപ്പ്
മേഖലയിലെ നിലവിലെ അസാധാരണ സാഹചര്യങ്ങൾ ചൂഷണം ചെയ്തുകൊണ്ട് സേവനങ്ങൾക്ക് യാതൊരുവിധ അമിത നിരക്കുകളും ഈടാക്കാൻ പാടില്ലെന്ന് മന്ത്രാലയം കർശന മുന്നറിയിപ്പ് നൽകി. സമുദ്ര ഗതാഗത നിയമങ്ങളും ഉപഭോക്തൃ സംരക്ഷണ നിയമങ്ങളും ഒരുപോലെ പാലിക്കപ്പെടേണ്ടതുണ്ട്. ചട്ടങ്ങൾ ലംഘിക്കുന്നവർക്കും നിയമവിരുദ്ധമായ പ്രവർത്തനങ്ങളിൽ ഏർപ്പെടുന്നവർക്കും എതിരെ ശക്തമായ നിയമനടപടികൾ സ്വീകരിക്കുമെന്നും മന്ത്രാലയത്തിന്റെ പ്രസ്താവനയിൽ വ്യക്തമാക്കുന്നു.
