2025 ജൂൺ 23 ന് അൽ ഉദൈദ് ബേസിൽ ഇറാൻ നടത്തിയ മിസൈൽ ആക്രമണത്തെ തുടർന്ന് എയർലൈൻ നേരിട്ട ആകസ്മിക പ്രസിദ്ധീകരിച്ച് വിശദീകരിച്ച് യാത്രക്കാർക്കായി തുറന്ന കത്ത് പ്രസിദ്ധീകരിച്ച് ഖത്തർ എയർവേയ്‌സ് സിഇഒ ബദർ മുഹമ്മദ് അൽ-മീർ.
നിർണായകഘട്ടം മികച്ച രീതിയിൽ കൈകാര്യം ചെയ്ത എയർലൈൻ ഗ്രൂപ്പിലെ വിവിധ മേഖലകളിൽ നിന്നുള്ള ടീമുകളെ തുറന്ന കത്തിൽ കമ്പനി അഭിനന്ദിച്ചു. അഭൂതപൂർവമായ തടസ്സത്തിനിടയിൽ എയർലൈനിൽ ക്ഷമയും വിശ്വാസവും കാണിച്ചതിന് എല്ലാ യാത്രക്കാർക്കും സിഇഒ നന്ദി പറഞ്ഞു.
മിസൈൽ ആക്രമണ സമയത്ത്, ദോഹയിലേക്ക് 20,000 ത്തിലധികം യാത്രക്കാരുമായി പോയ 90 ലധികം ഖത്തർ എയർവേയ്‌സ് വിമാനങ്ങൾ ഉടനടി വഴിതിരിച്ചുവിടേണ്ടി വന്നതായി കത്തിൽ പറഞ്ഞു. 25 വിമാനങ്ങൾ സൗദി അറേബ്യയിലുടനീളമുള്ള വിമാനത്താവളങ്ങളിലേക്കും 18 എണ്ണം തുർക്കിയിലേക്കും 15 എണ്ണം ഇന്ത്യയിലേക്കും 13 എണ്ണം ഒമാനിലേക്കും 5 എണ്ണം യുണൈറ്റഡ് അറബ് എമിറേറ്റുകളിലേക്കും തിരിച്ചുവിട്ടു. ശേഷിക്കുന്ന വിമാനങ്ങൾ ലണ്ടൻ, ബാഴ്‌സലോണ, യൂറോപ്പ്, ഏഷ്യ, മിഡിൽ ഈസ്റ്റ് എന്നിവിടങ്ങളിലെ പ്രധാന കേന്ദ്രങ്ങളിലേക്ക് തിരിച്ചുവിട്ടു.
ഹമദ് അന്താരാഷ്ട്ര വിമാനത്താവളത്തിനുള്ളിൽ, 10,000-ത്തിലധികം യാത്രക്കാർ ഇതിനകം തന്നെ യാത്രയ്ക്കായി കാത്തിരിക്കുകയായിരുന്നു. ആധുനിക വ്യോമയാന ചരിത്രത്തിലെ ഏറ്റവും കഠിനവും സങ്കീർണ്ണവുമായ പ്രവർത്തന വെല്ലുവിളികളിൽ ഒന്നിൽ അവർ എയർപോർട്ടിൽ കുടുങ്ങിപ്പോവുകയുണ്ടായി.
ജൂൺ 24 ചൊവ്വാഴ്ച അർദ്ധരാത്രിക്ക് ശേഷം വ്യോമാതിർത്തി വീണ്ടും തുറന്നതോടെ, വഴിതിരിച്ചുവിട്ട വിമാനങ്ങൾ മണിക്കൂറുകൾക്കകം തങ്ങളുടെ ദോഹ ഹബ്ബിലേക്ക് മടങ്ങാൻ തുടങ്ങി – ഓരോ വരവും തങ്ങളുടെ പ്രവർത്തനം വീണ്ടും കൂട്ടിച്ചേർക്കുന്നതിനുള്ള ഒരു ചുവടുവയ്പ്പായിരുന്നു. ഈ വിമാനങ്ങളും അതിലെ യാത്രക്കാരും ഹമദ് അന്താരാഷ്ട്ര വിമാനത്താവളത്തിൽ ഇറങ്ങിയപ്പോൾ, പ്രാദേശിക സമയം 05:00 ആയപ്പോഴേക്കും യാത്രാമാർഗ്ഗത്തിലുള്ള യാത്രക്കാരുടെ എണ്ണം 22,000-ത്തിലധികമായി ഉയർന്നു.
“കടുത്ത ഭൗമരാഷ്ട്രീയ സംഘർഷം ഞങ്ങളുടെ ആഗോള ഹബ് അടച്ചുപൂട്ടാൻ നിർബന്ധിതരാക്കി, പക്ഷേ ഞങ്ങളുടെ ലക്ഷ്യം യാത്രക്കാർക്ക് വേണ്ടിയുള്ള സേവനങ്ങൾ തുടർന്നും നൽകുക എന്നതായിരുന്നു,” അൽ-മീർ പറഞ്ഞു.
“ഈ ദുഷ്‌കരമായ സമയത്ത് ഞങ്ങളോടൊപ്പം യാത്ര ചെയ്ത എല്ലാവർക്കും… കഴിയുന്നത്ര സുരക്ഷിതമായും സുഗമമായും നിങ്ങളെ ലക്ഷ്യസ്ഥാനത്തേക്ക് കൊണ്ടുപോകാൻ, ഞങ്ങളോട് സഹകരിച്ച നിങ്ങളുടെ ക്ഷമയ്ക്കും വിശ്വാസത്തിനും അഗാധമായ നന്ദി രേഖപ്പെടുത്തുന്നു,” അദ്ദേഹം കൂട്ടിച്ചേർത്തു.
