അൽ വക്ര പോർട്ട് തീപിടുത്തം: രക്ഷാപ്രവർത്തനത്തിൽ സഹായിച്ചവരെ ആദരിച്ച് ആഭ്യന്തര വകുപ്പ്

കഴിഞ്ഞയാഴ്ച അൽ വക്ര തുറമുഖത്ത് ഉണ്ടായ തീപിടുത്തത്തിൽ രക്ഷാപ്രവർത്തനെത്തിയ പൗരന്മാരെയും താമസക്കാരെയും ആഭ്യന്തര സഹമന്ത്രി ഷെയ്ഖ് അബ്ദുൽ അസീസ് ബിൻ ഫൈസൽ ബിൻ മുഹമ്മദ് അൽ-താനി ആദരിച്ചു.

അൽ വക്ര തുറമുഖത്ത് അടുത്തിടെയുണ്ടായ തീപിടുത്തം ശമിപ്പിക്കാൻ ചിലർ മാതൃകാപരമായ സഹകരണം പ്രകടിപ്പിച്ചതായി ആഭ്യന്തര മന്ത്രാലയം (MoI) പ്രസ്താവിച്ചു. 

സിവിൽ ഡിഫൻസ് ടീമുകളുമായും ബന്ധപ്പെട്ട അധികാരികളുമായും ചേർന്ന് അവർ നടത്തിയ സമയോചിതവും ഉത്തരവാദിത്തപരവുമായ പ്രവർത്തനങ്ങൾ തീ നിയന്ത്രിക്കുന്നതിൽ നിർണായക പങ്ക് വഹിച്ചു. തീ പടരുന്നത് പരിമിതപ്പെടുത്തുന്നതിലും അത് നിയന്ത്രിക്കുന്നതിലും ഇവർ കാര്യമായ സ്വാധീനം ചെലുത്തി.

ധീരമായ നിലപാടുകൾക്കും ക്രിയാത്മകമായ പ്രവർത്തനങ്ങൾക്കും ആദരസൂചകമായി, ഇവർക്ക് ആഭ്യന്തര സഹമന്ത്രി അഭിനന്ദന സർട്ടിഫിക്കറ്റുകൾ സമ്മാനിച്ചു.

ജീവനും സ്വത്തിനും സംരക്ഷണം നൽകുന്നതിൽ സമൂഹാംഗങ്ങളും ദേശീയ സ്ഥാപനങ്ങളും തമ്മിലുള്ള സജീവ പങ്കാളിത്തത്തിന്റെ ഉദാഹരണമായി ഈ ബഹുമതി പ്രവർത്തിക്കുന്നു.