സ്വകാര്യ കിന്റർഗാർട്ടനിലെ നാലു വയസ്സുകാരി വിദ്യാർത്ഥിനി സ്‌കൂൾ ബസ്സിൽ കുടുങ്ങി മരണപ്പെട്ട സംഭവത്തിൽ വിദ്യാഭ്യാസ-ഉന്നത വിദ്യാഭ്യാസ മന്ത്രാലയം അനുശോചനം രേഖപ്പെടുത്തി. കൂടാതെ മന്ത്രാലയം ബന്ധപ്പെട്ട അധികാരികളുടെ സഹകരണത്തോടെ സംഭവത്തെക്കുറിച്ച് അന്വേഷണവും ആരംഭിച്ചിട്ടുണ്ട്.
അന്വേഷണത്തിന്റെ ഫലത്തെ അടിസ്ഥാനമാക്കി ഇക്കാര്യത്തിൽ ബാധകമായ ചട്ടങ്ങൾക്കനുസൃതമായി അശ്രദ്ധയ്‌ക്കെതിരെ ഏറ്റവും കഠിനമായ ശിക്ഷകൾ സ്വീകരിക്കുമെന്ന് മന്ത്രാലയം പറഞ്ഞു.
ഞങ്ങളുടെ വിദ്യാർത്ഥികൾക്കായി ഏറ്റവും ഉയർന്ന ഗുണനിലവാരമുള്ള സുരക്ഷാ മാനദണ്ഡങ്ങൾ പാലിക്കാനും ഇക്കാര്യത്തിൽ എന്തെങ്കിലും പോരായ്മകൾ സഹിക്കാതിരിക്കാനുമുള്ള പ്രതിബന്ധത സ്ഥിരീകരിക്കുന്നതായും മന്ത്രാലയം പ്രസ്താവനയിൽ പറഞ്ഞു.
മരിച്ച വിദ്യാർത്ഥിയുടെ കുടുംബത്തിന് ആത്മാർത്ഥമായ അനുശോചനം രേഖപ്പെടുത്തുന്നതായി മന്ത്രാലയം ആവർത്തിച്ചു.
ഞായറാഴ്ചയാണ് രാജ്യത്തെ നടുക്കിയ സംഭവമായി വക്ര സ്പ്രിംഗ് ഫീൽഡ് കിന്റർഗാർട്ടനിലെ വിദ്യാർഥിനിയായ മിൻസ മറിയം ജേക്കബ് (4 വയസ്സ്) സ്‌കൂൾ ബസിനുള്ളിൽ മരിച്ച നിലയിൽ കാണപ്പെട്ടത്.
സ്‌കൂളിലേക്കുള്ള യാത്രാമധ്യേ ബസ്സിൽ കുട്ടി ഉറങ്ങിപ്പോയെന്നും വിദ്യാർത്ഥി മറ്റുള്ളവരോടൊപ്പം ഇറങ്ങാതിരുന്നത് ബസ് ജീവനക്കാർ ശ്രദ്ധിച്ചില്ലെന്നുമാണ് പ്രാഥമിക വിവരം. തുറസ്സായ സ്ഥലത്ത് നിർത്തിയ അടച്ചുപൂട്ടിയ ബസിലായിരുന്നു കുട്ടി. രാവിലെ 11.30 ന് ഡ്യൂട്ടി പുനരാരംഭിക്കാൻ ബസിൽ തിരിച്ചെത്തിയപ്പോഴാണ് ജീവനക്കാർ കുട്ടിയെ ശ്രദ്ധിച്ചത്. അപ്പോഴേക്കും കുട്ടി മരിച്ചിരുന്നു.
കോട്ടയം ചിങ്ങവനം സ്വദേശികളായ അഭിലാഷ് ചാക്കോ, സൗമ്യ ദമ്പതികളുടെ ഇളയ മകളാണ്. കുട്ടിയുടെ നാലാം പിറന്നാൾ ദിനത്തിൽ കൂടിയാണ് ദാരുണ സംഭവമുണ്ടായത്.
നടപടിക്രമങ്ങൾ പൂർത്തിയാക്കി മൃതദേഹം നാട്ടിലേക്ക് കൊണ്ടുപോകാനുള്ള ശ്രമത്തിലാണെന്ന് ബന്ധപ്പെട്ടവർ പറഞ്ഞു.
