സർക്കസ് പ്രേമികൾക്ക് സ്വാഗതം; സൂഖ് അൽ വക്രയിൽ ‘ബിയോണ്ട് റിയാലിറ്റി’ അന്താരാഷ്ട്ര സർക്കസിന്റെ മൂന്നാം പതിപ്പ് ആരംഭിച്ചു

പ്രൈവറ്റ് എഞ്ചിനീയറിംഗ് ഓഫിസിന്റെ സെലിബ്രേഷൻസ് ഓർഗനൈസിംഗ് കമ്മിറ്റി സംഘടിപ്പിക്കുന്ന ‘ബിയോണ്ട് റിയാലിറ്റി’ അന്താരാഷ്ട്ര സർക്കസിന്റെ മൂന്നാം പതിപ്പ് സൂഖ് അൽ വക്രയിൽ ഇന്നലെ ആരംഭിച്ചു. ആദ്യ ദിനം മുതൽ തന്നെ ശക്തമായ ജനപങ്കാളിത്തമാണ് പരിപാടിക്ക് ലഭിച്ചത്.

സ്കൂൾ അവധിയും അറബ് കപ്പും അനുകൂലമായി
സ്കൂൾ അവധിക്കാലത്തിന്റെ തുടക്കത്തോടെയും അറബ് കപ്പ് കാണാനെത്തുന്ന സന്ദർശകരുടെ വർധനവിനോടും ഒത്തുചേരുന്ന തരത്തിലാണ് ഇത്തവണത്തെ സർക്കസ് സംഘടിപ്പിച്ചതെന്ന് അന്താരാഷ്ട്ര സർക്കസിന്റെ ജനറൽ സൂപ്പർവൈസർ ഖാലിദ് അൽ സുവൈദി ഖത്തർ ന്യൂസ് ഏജൻസിയോട് (QNA) സംസാരിക്കവെ പറഞ്ഞു.

ഖത്തറിലെ വിനോദസഞ്ചാര കേന്ദ്രങ്ങളും വിനോദ പരിപാടികളും അനുഭവിക്കാൻ നിരവധി സന്ദർശകർ ആഗ്രഹിക്കുന്നതും ടിക്കറ്റ് വിൽപ്പനയിലും ജനപങ്കാളിത്തത്തിലും അനുകൂലമായി പ്രതിഫലിച്ചതായും അദ്ദേഹം വ്യക്തമാക്കി. ഈ വർഷത്തെ പതിപ്പ് മുൻവർഷങ്ങളിലേതിൽ നിന്ന് പൂർണമായും വ്യത്യസ്തമാണെന്നും അൽ സുവൈദി പറഞ്ഞു. .

മൃഗങ്ങളും അന്താരാഷ്ട്ര പ്രകടനങ്ങളും
ഏകദേശം ഏഴ് എണ്ണം വരുന്ന കടുവകളും പുലികളുമടങ്ങുന്ന മൃഗസംഘം സർക്കസിന്റെ പ്രധാന ആകർഷണങ്ങളിലൊന്നാണ്. ഇതിന് പുറമെ, ലോകോത്തര ഡോഗ് ഷോകൾ, കര കൗശല പ്രകടനങ്ങൾ എന്നിവയുൾപ്പെടെയുള്ള അന്താരാഷ്ട്ര നിലവാരമുള്ള അവതരണങ്ങളും ഉൾപ്പെടുത്തിയിട്ടുണ്ട്.

ഒമ്പത് വ്യത്യസ്ത ഷോകൾ
ഏകദേശം ഒമ്പത് വ്യത്യസ്ത പ്രകടനങ്ങളാണ് പരിപാടിയുടെ ഭാഗമായി അവതരിപ്പിക്കുന്നത്. ഓരോ ഷോയും ഏകദേശം ഒരു മണിക്കൂറും പതിനഞ്ച് മിനിറ്റും ദൈർഘ്യമുള്ളതാണ്. എല്ലാ പ്രായത്തിലുള്ള കുടുംബാംഗങ്ങൾക്കും ആസ്വദിക്കാവുന്ന തരത്തിൽ ആവേശവും ആകാംക്ഷയും നിറഞ്ഞതാണ് ഷോകൾ. ഖത്തറിൽ ആദ്യമായി അവതരിപ്പിക്കുന്ന പ്രകടനങ്ങളും ഇതിലുണ്ട്.

എന്ത് കൊണ്ട് ഓൾഡ് അൽ വക്ര മാർക്കറ്റ്?
ദോഹയ്ക്ക് പുറത്തുള്ള വേദികളിൽ പരിപാടികൾ സംഘടിപ്പിക്കണമെന്ന സമീപനത്തിന്റെ ഭാഗമായാണ് ഓൾഡ് അൽ വക്ര മാർക്കറ്റ് വേദിയായി തിരഞ്ഞെടുത്തതെന്ന് അൽ സുവൈദി പറഞ്ഞു. വിനോദസഞ്ചാരവും പൈതൃക ആകർഷണങ്ങളും നിറഞ്ഞ ഈ മാർക്കറ്റ് കഴിഞ്ഞ കുറച്ചു വർഷങ്ങളായി സർക്കസ് പരിപാടികൾക്ക് പ്രശസ്ത കേന്ദ്രമായി മാറിയിട്ടുണ്ടെന്നും അദ്ദേഹം കൂട്ടിച്ചേർത്തു.

മികച്ച അന്താരാഷ്ട്ര പ്രകടനങ്ങൾ ഉറപ്പാക്കുമെന്ന് സംഘാടകർ
ഓരോ പതിപ്പിലും ഏറ്റവും പുതിയതും മികച്ചതുമായ അന്താരാഷ്ട്ര പ്രകടനങ്ങൾ ഖത്തറിലെത്തിക്കുമെന്നും ആവർത്തനമില്ലാത്ത, പുതുമയുള്ള ഉള്ളടക്കം പ്രേക്ഷകർക്ക് നൽകുമെന്നും അൽ സുവൈദി വ്യക്തമാക്കി. ഇതിലൂടെ ‘ബിയോണ്ട് റിയാലിറ്റി’ അന്താരാഷ്ട്ര സർക്കസ്, രാജ്യത്തെ മുൻനിര വിനോദ പരിപാടികളിലൊന്നായി നിലനിർത്തുമെന്നും അദ്ദേഹം പറഞ്ഞു.