ജൂലൈ 10 ന് ദോഹയിൽ നടന്ന സംയുക്ത വർക്കിംഗ് ഗ്രൂപ്പ് (ജെഡബ്ല്യുജി) ഇന്ത്യയുടെയും ഖത്തറിൻ്റെയും സാമ്പത്തിക കാര്യങ്ങൾ ചർച്ച ചെയ്തു. ഇന്ത്യയിലെയും ഖത്തറിലെയും വാണിജ്യ വകുപ്പുകളിലെയും മറ്റ് മന്ത്രാലയങ്ങളിലെയും ഉദ്യോഗസ്ഥരാണ് ജെഡബ്ല്യുജി യോഗം ചേർന്നത്.
ഉഭയകക്ഷി വ്യാപാരവും നിക്ഷേപ സഹകരണവും മെച്ചപ്പെടുത്തുന്നതിനുള്ള വഴികളെക്കുറിച്ച് യോഗം ചർച്ച ചെയ്തുവെന്ന് പ്രസ് ഇൻഫർമേഷൻ ബ്യൂറോ പത്രക്കുറിപ്പിൽ അറിയിച്ചു.
ഭക്ഷ്യസുരക്ഷയ്ക്കും സഹകരണത്തിനുമായി ഉഭയകക്ഷി ധാരണാപത്രം (എംഒയു) സംബന്ധിച്ച് നടന്നുകൊണ്ടിരിക്കുന്ന ചർച്ചകൾ അവസാനിപ്പിക്കുന്നതിനുള്ള നടപടികൾ വേഗത്തിലാക്കാൻ ഇരുരാജ്യങ്ങളും സമ്മതിച്ചു.
ജോയിൻ്റ് ബിസിനസ് കൗൺസിൽ ചർച്ചകളുടെ പുരോഗതി യോഗം വിലയിരുത്തി. സ്വകാര്യ മേഖലയുടെ വ്യാപാര, നിക്ഷേപ നിർദേശങ്ങൾ നടപ്പിലാക്കുന്നതിൽ ജോയിൻ്റ് ബിസിനസ് കൗൺസിൽ സജീവമാക്കാനുള്ള നിർദ്ദേശവും ചർച്ച ചെയ്തു.
ഉഭയകക്ഷി വ്യാപാര, സാമ്പത്തിക സഹകരണത്തിലെ സമീപകാല സംഭവവികാസങ്ങൾ ഇരു രാജ്യങ്ങളും അവലോകനം ചെയ്തു. ഇരു രാജ്യങ്ങളും തമ്മിലുള്ള ബന്ധം കൂടുതൽ മെച്ചപ്പെടാൻ സാധ്യതയുണ്ടെന്ന് യോഗം ചൂണ്ടിക്കാട്ടി.
രത്നങ്ങളും ആഭരണങ്ങളും, കസ്റ്റംസ് അധികാരികൾ തമ്മിലുള്ള സഹകരണം, പ്രാദേശിക കറൻസി വ്യാപാരം, ഫാർമസ്യൂട്ടിക്കൽസ്, ഭക്ഷ്യ സംസ്കരണം, ഭക്ഷ്യ സുരക്ഷ, ചെറുകിട വ്യവസായ സഹകരണം എന്നിവയുൾപ്പെടെ ഉഭയകക്ഷി വ്യാപാരം മെച്ചപ്പെടുത്തുന്നതിന് സംയുക്ത വർക്കിംഗ് ഗ്രൂപ്പ് നിരവധി മേഖലകൾ കണ്ടെത്തി.
ഇന്ത്യൻ വാണിജ്യ വകുപ്പിൻ്റെ സാമ്പത്തിക ഉപദേഷ്ടാവും ഖത്തർ വാണിജ്യ വ്യവസായ മന്ത്രാലയത്തിൻ്റെ ഇൻ്റർനാഷണൽ കോ-ഓപ്പറേഷൻ ആൻഡ് ട്രേഡ് എഗ്രിമെൻ്റ് ഡയറക്ടറും ചേർന്നാണ് ജെഡബ്ല്യുജി യോഗത്തിന് നേതൃത്വം നൽകിയത്. ജെഡബ്ല്യുജിയുടെ അടുത്ത യോഗം 2025ൽ ന്യൂഡൽഹിയിൽ നടക്കും.
🇶🇦 ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ്👇https://chat.whatsapp.com/KzKal0sXKHF3P2dagEwpi5
