ദുബായ് സ്റ്റുഡിയോ സിറ്റിയിലെ സ്റ്റാമിന 11 ജിംനാസ്റ്റിക്സ് സെന്ററിൽ അടുത്തിടെ നടന്ന ദുബായ് ഓപ്പൺ ഫോർ ജിംനാസ്റ്റിക്സ് അക്കാദമികളിൽ ഖത്തറിൽ നിന്നുള്ള 30-ലധികം യുവ അത്‌ലറ്റുകൾ തങ്ങളുടെ വ്യക്തിമുദ്ര പതിപ്പിച്ചു. 3 ഓവറോൾ ചാമ്പ്യൻ കിരീടങ്ങളും നിരവധി വ്യക്തിഗത മെഡലുകളും ഈ മത്സരത്തിൽ നേടി.
16-ലധികം സ്പെഷ്യലൈസ്ഡ് അക്കാദമികളിൽ നിന്നും കുവൈറ്റ്, യുഎഇ, കെനിയ എന്നിവിടങ്ങളിൽ നിന്നുള്ള ക്ലബ്ബുകളിൽ നിന്നുമുള്ള 750-ലധികം പ്രതിഭാധനരായ ജിംനാസ്റ്റുകളുമായാണ് പെൺകുട്ടികൾ മത്സരിച്ച് വിജയിച്ചത്.
ദോഹയിലെ “റെബൽ ഏഞ്ചൽസ് ജിംനാസ്റ്റിക്സ് അക്കാദമിയിലെ” വിദ്യാർത്ഥികൾ ജനുവരിയിൽ ദുബായ് ഓപ്പണിനായി തയ്യാറെടുക്കാൻ തുടങ്ങി, അവരിൽ പലരും ആദ്യമായി അന്താരാഷ്ട്ര വേദിയിലേക്ക് കാലെടുത്തുവയ്ക്കുകയായിരുന്നു എന്നത് ശ്രദ്ധേയം.
“ലോകപ്രശസ്ത ജിംനാസ്റ്റ് ടോം കോൾ ജൂറിയിൽ ഉണ്ടായിരുന്നതിനാൽ മത്സരം കഠിനമായിരുന്നുവെന്ന് എനിക്ക് മനസ്സിലായി. സത്യം പറഞ്ഞാൽ, ഞങ്ങൾ പോഡിയത്തിൽ എത്തുമോ എന്ന് ഞങ്ങൾക്ക് ഉറപ്പില്ലായിരുന്നു”- റെബൽ ഏഞ്ചൽസ് അക്കാദമിയുടെ സ്ഥാപക അന്ന റോസ-സാലെവ്സ്കി പറഞ്ഞു. മാസങ്ങളായി പെൺകുട്ടികളുടെ സമർപ്പണവും പുരോഗതിയും പ്രചോദനം നൽകുന്നതാണെന്ന് അവർ കൂട്ടിച്ചേർത്തു.
പ്രതിഭകളുടെ ധാരാളിത്തം കൊണ്ട് ശ്രദ്ധേയമായ ടൂർണമെന്റിലെ വിജയം ഖത്തർ ടീമിന്റെ തിളക്കം കൂട്ടുന്നു.
അതേസമയം, ഇത് റെബൽ ഏഞ്ചൽസിന് വിജയങ്ങൾ ഇതാദ്യമല്ല. ഇൻസ്റ്റിറ്റ്യൂട്ട് മുമ്പ് അബുദാബിയിൽ രണ്ട് തവണ ഖത്തറിനെ പ്രതിനിധീകരിച്ചിരുന്നു, രണ്ട് പങ്കാളിത്തങ്ങളിലും ശക്തമായ പോഡിയം ഫിനിഷുകൾ നേടി. പ്രാദേശികമായി, ഇൻസ്റ്റിറ്റ്യൂട്ട് മികച്ച അക്കാദമികളുമായി മത്സരിച്ചിരുന്നു. ഓരോ തവണയും ജിംനാസ്റ്റുകൾ മികച്ച പ്രകടനങ്ങൾ കാഴ്ചവച്ചു.
