ദോഹ: ഖത്തറിൽ വേനൽക്കാലത്തിന് മുന്നോടിയായുള്ള ‘അൽ-സറായത്ത്’ (Al-Sarayat) കാലാവസ്ഥാ സീസൺ ആരംഭിച്ചതായി ഖത്തർ കാലാവസ്ഥാ വകുപ്പ് (QMD) അറിയിച്ചു. മാർച്ച് അവസാന വാരം മുതൽ മെയ് പകുതി വരെയാണ് സാധാരണയായി ഈ കാലാവസ്ഥാ പ്രതിഭാസം കണ്ടുവരുന്നത്.
അതിവേഗം രൂപപ്പെടുന്ന കാർമേഘങ്ങളും ചുരുങ്ങിയ സമയത്തിനുള്ളിൽ പെയ്യുന്ന ശക്തമായ ഇടിമിന്നലോടു കൂടിയ മഴയുമാണ് ഈ കാലയളവിന്റെ പ്രത്യേകത. വൈകുന്നേരങ്ങളിലും രാത്രികാലങ്ങളിലും ഇടവിട്ട് ഈ പ്രതിഭാസം ഉണ്ടാകുന്നതിനാലാണ് പ്രാദേശികമായി ഇതിനെ ‘അൽ-സറായത്ത്’ എന്ന് വിളിക്കുന്നത്.
ശക്തമായ ഇടിമിന്നലിന് പുറമെ, ആഞ്ഞടിക്കുന്ന കാറ്റിനും (Downdraft winds) ഇതിനോടനുബന്ധിച്ച് സാധ്യതയുണ്ട്. ഇത് രാജ്യത്തിന്റെ ചില ഭാഗങ്ങളിൽ പൊടിപടലങ്ങൾ ഉയരുന്നതിനും കാഴ്ചപരിധി കുറയുന്നതിനും കാരണമായേക്കാം. അതിനാൽ വരും ദിവസങ്ങളിൽ ജാഗ്രത പാലിക്കണമെന്ന് കാലാവസ്ഥാ നിരീക്ഷണ കേന്ദ്രം നിർദ്ദേശിച്ചു.
