ഫോർബ്‌സ് 2025ലെ ഏറ്റവും വലിയ കോടീശ്വരന്മാരുടെ പട്ടിക പുറത്തിറക്കി. ലോകമെമ്പാടുമുള്ള 3,028 കോടീശ്വരന്മാരെ ഇതിൽ ഉൾപ്പെടുത്തിയിട്ടുണ്ട്. ഇതാദ്യമായാണ് കോടീശ്വരന്മാരുടെ എണ്ണം 3,000 കവിയുന്നത്.
രണ്ട് പ്രശസ്‌തരായ ഖത്തരികൾ ഈ പട്ടികയിൽ ഇടം നേടി. ഷെയ്ഖ് ഹമദ് ബിൻ ജാസിം ബിൻ ജാബർ അൽ താനി, ഷെയ്ഖ് ഫൈസൽ ബിൻ ഖാസിം അൽ താനി എന്നിവരാണത്.
മുൻപ് ഖത്തറിന്റെ പ്രധാനമന്ത്രിയും വിദേശകാര്യ മന്ത്രിയുമായിരുന്ന ഷെയ്ഖ് ഹമദ് അറബ് ശതകോടീശ്വരന്മാരിൽ എട്ടാം സ്ഥാനത്തും ലോകത്ത് 929-ാം സ്ഥാനത്തും ആണ്. ധനകാര്യം, റിയൽ എസ്റ്റേറ്റ്, ഊർജ്ജം എന്നിവയിലെ നിക്ഷേപങ്ങളിൽ നിന്നും അദ്ദേഹത്തിന് 3.9 ബില്യൺ ഡോളറിന്റെ ആസ്‌തിയുണ്ട്.
ഖത്തരി ബിസിനസ്മെൻ അസോസിയേഷന്റെ ചെയർമാനാണ് ഷെയ്ഖ് ഫൈസൽ. ആഗോളതലത്തിൽ 1,850-ാം സ്ഥാനത്തുള്ള അദ്ദേഹത്തിന്റെ ആസ്തി 1.9 ബില്യൺ ഡോളറാണ്. നിർമ്മാണം, ഹോസ്പിറ്റാലിറ്റി, ധനകാര്യം എന്നീ മേഖലകളിലെ പ്രവർത്തനങ്ങളിൽ നിന്നാണ് അദ്ദേഹത്തിന്റെ സമ്പത്ത് വന്നിരിക്കുന്നത്.
ആഗോള സമ്പദ്‌വ്യവസ്ഥയിൽ ഖത്തറിന്റെ വർദ്ധിച്ചുവരുന്ന സ്വാധീനമാണ് പട്ടികയിൽ ഇവരുടെ സാന്നിധ്യം കാണിക്കുന്നത്. ഈ വർഷം കൂടുതൽ അറബ് കോടീശ്വരന്മാർ പട്ടികയിൽ ഇടം നേടി, ഏഴ് വർഷത്തിന് ശേഷം സൗദി അറേബ്യയും ഫോർബ്‌സ് പട്ടികയിൽ തിരിച്ചെത്തി.
മിഡിൽ ഈസ്റ്റ്, നോർത്ത് ആഫ്രിക്ക (മെന) മേഖലയിൽ ഒമ്പത് രാജ്യങ്ങളിൽ നിന്നുള്ള 38 കോടീശ്വരന്മാർ ലിസ്റ്റിലുണ്ട്. 2024-ൽ പട്ടികപ്പെടുത്തിയ 20 ശതകോടീശ്വരന്മാരെ അപേക്ഷിച്ച് ഇരട്ടിയോളമാണിത്.
ഖത്തറിലെ വാർത്തകളും വിവരങ്ങളും തത്സമയം ലഭിക്കാൻ -വാട്ട്സ്ആപ്പ് ഗ്രൂപ്പ് 👇https://chat.whatsapp.com/JlM3OXullDx42kdlpGxvJE
