സിസിടിവി ക്യാമറകൾ സ്ഥാപിക്കാൻ അംഗീകൃത കമ്പനികളെ സമീപിക്കണം; പൊതുജനങ്ങൾക്ക് ആഭ്യന്തര മന്ത്രാലയത്തിന്റെ നിർദ്ദേശം

സുരക്ഷാ നിരീക്ഷണ ക്യാമറകൾ (CCTV) സ്ഥാപിക്കുമ്പോൾ സർക്കാർ ലൈസൻസുള്ളതും മന്ത്രാലയത്തിൽ രജിസ്റ്റർ ചെയ്തതുമായ കമ്പനികളെ മാത്രം സമീപിക്കണമെന്ന് ഖത്തർ ആഭ്യന്തര മന്ത്രാലയം പൊതുജനങ്ങളോട് ആവശ്യപ്പെട്ടു. സുരക്ഷ ഉറപ്പാക്കുന്നതിനൊപ്പം വ്യക്തിവിവരങ്ങളുടെ സ്വകാര്യത സംരക്ഷിക്കുന്നതിനും ഇത് അത്യന്താപേക്ഷിതമാണെന്ന് മന്ത്രാലയം സോഷ്യൽ മീഡിയ പോസ്റ്റിലൂടെ വ്യക്തമാക്കി. ആഭ്യന്തര മന്ത്രാലയത്തിന് കീഴിലുള്ള സെക്യൂരിറ്റി സിസ്റ്റംസ് ഡിപ്പാർട്ട്‌മെന്റ് അംഗീകരിച്ച 162 കമ്പനികളുടെ പട്ടികയും മന്ത്രാലയം പ്രസിദ്ധീകരിച്ചിട്ടുണ്ട് – https://portal.moi.gov.qa/wps/wcm/connect/53b0abdf-123c-472a-829d-e66282a271e1/accredited_companies_April2026.pdf?MOD=AJPERES&CVID=pRNqi1m

ഈ കമ്പനികൾക്ക് മന്ത്രാലയത്തിന്റെ ടെലികമ്മ്യൂണിക്കേഷൻസ് ആൻഡ് ഇൻഫർമേഷൻ സിസ്റ്റംസ് ജനറൽ ഡയറക്ടറേറ്റിന്റെ പ്രത്യേക ലൈസൻസ് ലഭ്യമാണ്.

സൈബർ ആക്രമണങ്ങൾക്കെതിരെ ജാഗ്രത വേണം

വീടുകളിലും മറ്റും സ്ഥാപിച്ചിട്ടുള്ള നിരീക്ഷണ ക്യാമറകളുടെ സുരക്ഷ ഉറപ്പാക്കാൻ പാസ്‌വേഡുകൾ കൃത്യമായ ഇടവേളകളിൽ മാറ്റണമെന്ന് മന്ത്രാലയം നിർദ്ദേശിച്ചു. സൈബർ ആക്രമണങ്ങളിൽ നിന്ന് ക്യാമറകളെ സംരക്ഷിക്കാൻ ഇത് സഹായിക്കും. കൂടാതെ, സ്വകാര്യത ലംഘിക്കപ്പെടാതിരിക്കാൻ സുരക്ഷിതമല്ലാത്തതോ വിശ്വസിക്കാൻ കഴിയാത്തതോ ആയ ഇന്റർനെറ്റ് ലിങ്കുകൾ വഴി ക്യാമറ ദൃശ്യങ്ങൾ ആക്സസ് ചെയ്യരുതെന്നും ആഭ്യന്തര മന്ത്രാലയം മുന്നറിയിപ്പ് നൽകി. ഉപയോക്താക്കളുടെ സുരക്ഷയ്ക്കും സ്വകാര്യതയ്ക്കും മുൻഗണന നൽകിക്കൊണ്ടുള്ള മുൻകരുതൽ നടപടികൾ സ്വീകരിക്കണമെന്ന് അധികൃതർ ഓർമ്മിപ്പിച്ചു.