ഫിഫ ലോകകപ്പ് 2022 ആതിഥേയത്വം വഹിച്ചത് ഖത്തറിന്റെ സാമ്പത്തിക വൈവിധ്യവൽക്കരണം വേഗത്തിലാക്കിയെന്ന് ഐഎംഎഫ് റിപ്പോർട്ട്

ഫിഫ ലോകകപ്പ് 2022 ആതിഥേയത്വം വഹിച്ചത് എണ്ണയെയും വാതകത്തെയും കൂടുതൽ ആശ്രയിക്കുന്നതിൽ നിന്നും മാറി നടക്കുന്നത് വേഗത്തിലാക്കാൻ ഖത്തറിനെ സഹായിച്ചുവെന്ന് ഇന്റർനാഷണൽ മോണിറ്ററി ഫണ്ടിന്റെ (IMF) റിപ്പോർട്ട്. 2011 മുതൽ തുറമുഖങ്ങൾ, റോഡുകൾ, മെട്രോ സംവിധാനങ്ങൾ, വിമാനത്താവളങ്ങൾ എന്നിവയുൾപ്പെടെയുള്ള പൊതു അടിസ്ഥാന സൗകര്യങ്ങളിൽ ഖത്തർ വൻതോതിൽ നിക്ഷേപം നടത്തി. ഐഎംഎഫ് റിപ്പോർട്ട് പ്രകാരം ഈ മൊത്തം നിക്ഷേപത്തിൻ്റെ ഏകദേശം 5% മാത്രമാണ് സ്റ്റേഡിയങ്ങൾക്കായി ചിലവാക്കിയത്.

ലോകകപ്പിന് ശേഷം ഖത്തറിൻ്റെ ആഗോള പ്രൊഫൈൽ വളരെയധികം മുന്നേറി, ഇത് സന്ദർശകരുടെ കുതിപ്പിനും കാരണമായിട്ടുണ്ട്. 2023ൽ, സന്ദർശകരുടെ എണ്ണം പാൻഡെമിക്കിന് മുമ്പുള്ളതിനേക്കാൾ ഇരട്ടിയായിരുന്നു, ടൂറിസം പുതിയ ഉയരങ്ങളിലെത്തുകയും ചെയ്‌തു. കഴിഞ്ഞ ദശകത്തിൽ അടിസ്ഥാന സൗകര്യ വികസനത്തിൽ ഖത്തർ നടത്തിയ നിക്ഷേപങ്ങൾ രാജ്യത്തിന്റെ സാമ്പത്തിക വൈവിധ്യവൽക്കരണത്തിന് കാരണമായെന്ന് ഐഎംഎഫ് റിപ്പോർട്ട് എടുത്തുകാണിക്കുന്നു. ഓരോ വർഷവും സമ്പദ്‌വ്യവസ്ഥയുടെ എണ്ണ ഇതര വിഭാഗത്തിൻ്റെ വളർച്ചയിലേക്ക് ഇത് 5-6 ശതമാനം പോയിൻ്റുകൾ ചേർത്തു.

എണ്ണ, വാതക ഇതര മേഖലകളിൽ തൊഴിലവസരങ്ങൾ, പുതിയ ബിസിനസുകൾ, അവസരങ്ങൾ എന്നിവ സൃഷ്‌ടിക്കാൻ പുതിയ അടിസ്ഥാന സൗകര്യങ്ങൾ ഉപയോഗിക്കാനാകും. ഘടനാപരമായ പരിഷ്‌കാരങ്ങളിലൂടെ ഖത്തർ കാര്യമായ പുരോഗതി കൈവരിച്ചതായും ഐഎംഎഫ് ചൂണ്ടിക്കാട്ടുന്നു. തൊഴിൽ ശക്തിയുടെ 95% വരുന്ന വിദേശ തൊഴിലാളികൾക്കുള്ള തൊഴിൽ സംരക്ഷണം രാജ്യം മെച്ചപ്പെടുത്തിയിട്ടുണ്ട്.

കൂടാതെ തൊഴിലാളികളുടെ ചലനാത്മകതയെ പരിമിതപ്പെടുത്തിയിരുന്ന കഫാല സമ്പ്രദായം അവസാനിപ്പിച്ച GCCയിലെ ആദ്യത്തെ രാജ്യവും ഖത്തറാണ്. ലോകബാങ്കിൻ്റെ GovTech Maturity Indexൽ 198 രാജ്യങ്ങളിൽ 16-ആം സ്ഥാനത്തെത്തിയ ഖത്തർ, ബിസിനസ് കാര്യക്ഷമത മെച്ചപ്പെടുത്തുകയും വിദേശ നിക്ഷേപം ആകർഷിക്കുകയും ഡിജിറ്റൽ കഴിവുകൾ മെച്ചപ്പെടുത്തുകയും ചെയ്തു.

വിദഗ്ധരായ വിദേശ തൊഴിലാളികളെ ആകർഷിക്കുന്നതിനും ചെറുകിട, ഇടത്തരം സംരംഭങ്ങൾക്ക് ധനസഹായം ലഭിക്കുന്നത് എളുപ്പമാക്കുന്നതിനും മത്സരവും വ്യാപാരവും പ്രോത്സാഹിപ്പിക്കുന്നതിനുള്ള പരിഷ്‌കാരങ്ങളും ഗണ്യമായ വളർച്ചയുണ്ടാകാൻ സഹായിക്കുന്ന ഘടകങ്ങളാണ്. സമഗ്രമായ പരിഷ്‌കാരങ്ങൾ ഈ കാലയളവിൽ എണ്ണ ഇതര മേഖലയുടെ വളർച്ചയെ പ്രതിവർഷം ഏകദേശം 3 ശതമാനം വർദ്ധിപ്പിക്കുമെന്ന് IMF അഭിപ്രായപ്പെടുന്നു.

മികച്ച ഫലങ്ങൾ നേടുന്നതിന്, ഈ പ്രവർത്തനങ്ങൾ ശ്രദ്ധാപൂർവ്വം ആസൂത്രണം ചെയ്യുകയും, ആസൂത്രണം ചെയ്‌ത കാര്യങ്ങൾ നടത്താൻ രാജ്യത്തിന് കഴിയുകയും വേണം. ഡിജിറ്റലൈസേഷനിലെയും കാലാവസ്ഥാ പ്രവർത്തനങ്ങളിലെയും പുരോഗതിക്ക് പുതിയ വളർച്ചാ അവസരങ്ങൾ സൃഷ്‌ടിക്കാനും സുസ്ഥിരത വർദ്ധിപ്പിക്കാനും കഴിയും.

സ്റ്റാൻഡേർഡ് ചാർട്ടേഡ് റിപ്പോർട്ട് അനുസരിച്ച്, ഖത്തറിൻ്റെ സമ്പദ്‌വ്യവസ്ഥ 2031 ഓടെ ഇരട്ടിയാകുമെന്ന് പ്രതീക്ഷിക്കുന്നു, ഹൈഡ്രോകാർബൺ ഉൽപ്പന്നങ്ങളുടെ വിലയും ഊർജത്തിൻ്റെ ആഗോള ആവശ്യകതയും വർദ്ധിക്കുന്നുണ്ട്, പ്രത്യേകിച്ച് ദ്രവീകൃത പ്രകൃതി വാതകത്തിന്റെ (എൽഎൻജി) കാര്യത്തിൽ.

സമ്പദ്‌വ്യവസ്ഥയെ വൈവിധ്യവൽക്കരിക്കുന്നതിലുള്ള ഖത്തറിൻ്റെ ശ്രദ്ധ, 2014 ലെ എണ്ണ വിലയിടിവിന് മുൻപുണ്ടായിരുന്ന തലത്തിലേക്ക് രാജ്യത്തിന്റെ വരുമാനം വീണ്ടെടുക്കാൻ സഹായിക്കുന്നതാണ്. ഇത് എണ്ണയെയും ഗ്യാസിനെയും ആശ്രയിക്കുന്നത് കുറയ്ക്കുകയും വിലയിലെ മാറ്റങ്ങൾ നന്നായി കൈകാര്യം ചെയ്യാൻ പ്രാപ്‌തമാക്കുകയും ചെയ്യുന്നു.